തിരുവനന്തപുരം: യൂണിവേഴ്സിറ്റി കോളേജില് യൂണിറ്റ് തുടങ്ങി പ്രവര്ത്തനം ആരംഭിച്ച സംഘടനകള് വെട്ടിലായി. കോളേജിനുള്ളിലെ പോലീസ് സാന്നിധ്യംകണ്ട് ധൈര്യംകാണിച്ചവര്ക്ക് ഇപ്പോള് ഓടാന് കണ്ടം കണ്ടുപിടിക്കേണ്ട അവസ്ഥ. യൂണിവേഴ്സിറ്റി കോളേജില് നായകളെ പോലെ പോലീസുകാരെ എസ്എഫ്ഐക്കാര് വിരട്ടി ഗേറ്റിന് പുറത്താക്കിയപ്പോള് ശരിക്കും ഞെട്ടിയത് നേതാക്കളുടെ വാക്കുകേട്ട് തലവച്ചുകൊടുത്ത ഇതരസംഘടനകളിലെ വിദ്യാര്ഥികള്.
യൂണിവേഴ്സിറ്റി കോളേജിലെ അഖില് എന്ന വിദ്യാര്ഥിയെ കുത്തിയ സംഭവവുമായി ബന്ധപ്പെട്ട് കോണ്ഗ്രസ്സിന്റെയും സിപിഐയുടെയും വിദ്യാര്ഥിസംഘടനകള് വന് പ്രക്ഷോഭങ്ങളാണ് നടത്തിയത്. എബിവിപി സമരരംഗത്തുണ്ടായിരുന്നെങ്കിലും കോളേജില് യൂണിറ്റ് രൂപീകരിച്ചില്ല. എസ്എഫ്ഐ കൈയൂക്കിലൂടെ മേധാവിത്വം പുലര്ത്തിയിരുന്ന യൂണിവേഴ്സിറ്റി കോളേജില് എഐഎസ്എഫ്, കെഎസ്യു സംസ്ഥാന നേതാക്കളുടെ സാന്നിധ്യത്തില് യൂണിറ്റും ആരംഭിച്ചു.
എസ്എഫ്ഐയുടെ കോട്ടയില് യൂണിറ്റ് തുടങ്ങാനുള്ള വിദ്യാര്ഥികളെ കണ്ടെത്തി എന്നതു പാര്ട്ടിയെ കുറച്ചൊന്നുമല്ല അസ്വസ്ഥരാക്കിയത്. ഇത് എഐഎസ്എഫും കെഎസ്യുവും മേനിയായി വിളമ്പുകയും ചെയ്തു. പോലീസ് സാന്നിധ്യമുണ്ട്, കോളേജിനകത്ത് ഏത് ആക്രമണമുണ്ടായാലും പോലീസ് നോക്കിക്കൊള്ളുമെന്ന് പറഞ്ഞ് നേതാക്കളില്നിന്നും ധൈര്യം പകര്ന്നുകിട്ടിയ കുട്ടി നേതാക്കള്ക്കാണ് ശരിക്കും പണികിട്ടിയത്. എസ്എഫ്ഐയെ വെല്ലുവിളിച്ചു, അവര്ക്കെതിരെ മുദ്രാവാക്യം മുഴക്കി, മാധ്യമങ്ങളില് ചിത്രവും വന്നു. എന്നാല് ഇനി തുടര്ന്ന് എങ്ങനെ സംഘടനാ പ്രവര്ത്തനം നടത്തും എന്നതിന് അപ്പുറം എങ്ങനെ കോളേജില് കയറും, പഠിക്കും എന്നത് ചോദ്യചിഹ്നമായി അവശേഷിക്കുന്നു.
കോളേജിനുള്ളില് പ്രവര്ത്തനമാരംഭിച്ച വിദ്യാര്ഥി സംഘടനകള് മെമ്പര്ഷിപ്പ് ക്യാമ്പയിന് നടത്തുന്നത് തടയാന് ഏകാധിപത്യ മനസുള്ള എസ്എഫ്ഐക്ക് പോലീസിന്റെ സാന്നിധ്യം പ്രശ്നമായിരുന്നു. കോളേജിനകത്തെ പോലീസ് സാന്നിധ്യമൊഴിവാക്കാന് എസ്എഫ്ഐ നടത്തിയ ശ്രമം ഒടുവില് വിജയം കണ്ടു. കഴിഞ്ഞ ദിവസം എസ്എഫ്ഐയുടെ ഇടിമുറിയില് വിശ്രമിച്ച പോലീസുകാരുടെ ലാത്തിയും ഷീല്ഡും എസ്എഫ്ഐക്കാര് എടുത്തെറിയുകയും അസഭ്യം വിളിച്ച് പിടിച്ചുതള്ളുകയും ചെയ്തു. തൊട്ടടുത്തദിവസം ഭരണപക്ഷത്തിന്റെ സമ്മര്ദത്തെ തുടര്ന്ന് പോലീസ് അധികാരികള് പോലീസുകാരോട് കോളേജിന് പുറത്തിറങ്ങാന് നിര്ദേശിക്കുകയായിരുന്നു. പോലീസുകാരുമായി സംഘര്ഷത്തിന് എസ്എഫ്ഐ ശ്രമിച്ചതോടെ വെള്ളിയാഴ്ച്ച ഉച്ചയ്ക്ക് ശേഷം കോളേജിന് അവധിയായിരുന്നു. ശനിയാഴ്ചയും ഞായറാഴ്ചയും പ്രവര്ത്തിദിവസമല്ലാത്തതിനാല് ഇന്ന് കോളേജ് തുറന്നു.
എസ്എഫ്ഐ സഖാക്കള്ക്ക് പണി ഉണ്ടാക്കണ്ടാ എന്ന് കരുതി പുതിയ യൂണിറ്റ് നേതാക്കള് കോളേജില് വരാതിരിക്കുമോ എന്നതാണ് കണ്ടറിയേണ്ടത്. യൂണിവേഴ്സിറ്റി കോളേജ് ഏകാധിപത്യത്തിലേക്ക് പതിയെ തിരിച്ച് പോകുകയാണ്.
