മലപ്പുറം : രാജ്യത്തെ ചെറുകിട വ്യവസായ സംരംഭങ്ങളെ സ്വാഗതം ചെയ്തുകൊണ്ട് പ്രധാനമന്ത്രി നരേന്ദ്രമോദി തുടക്കമിട്ട മുദ്രാ വായ്‌പ്പയ്‌ക്കെത്തിയ അപേക്ഷകനെ അധിക്ഷേപിച്ച് ഫെഡറല്‍ ബാങ്ക്. ചെറുകിട വ്യവസായം ആരംഭിക്കാന്‍ ശ്രമിച്ച യുവമോര്‍ച്ചാ നേതാവ് കൂടിയായ യുവാവിനെ മലപ്പുറത്തെ ഫെഡറല്‍ ബാങ്ക് റീജണല്‍ മാനേജരാണ് അപമര്യാദയായി പെരുമാറിയത്.
ബാങ്കില്‍ കറന്റ് അക്കൗണ്ട് ഉടമയായിട്ടും ആവശ്യപ്പെട്ട എല്ലാ രേഖകളും ഹാജരാക്കിയിട്ടും വായ്‌പ്പ നല്‍കാത്തത് സംബന്ധിച്ച് ചോദിക്കാനെത്തിയ്‌പ്പോഴാണ് മാനേജര്‍ അപേക്ഷ നിരസിച്ചത്. എട്ടുമാസത്തോളമായി യുവാവിനെ വായ്‌പ്പയ്‌ക്കെന്ന പേരില്‍ ബാങ്ക് അധികൃതര്‍ നടത്തിച്ചെന്നും ആരോപണം ഉണ്ട്.
വായ്‌പ പ്രതീക്ഷിച്ച് സംരംഭം തുടങ്ങിയ യുവാവ് കടക്കെണിയിലാണെന്നും ആത്മഹത്യയുടെ വക്കിലാണെന്ന് അറിയിച്ചിട്ടും മാനേജര്‍ ഒരു ഭാവ വ്യത്യാസവും ഇല്ലാതെയാണ് പെരുമാറിയത്. അതേസമയം ഈടോ, പണയമോ നല്‍കുകയാണെങ്കില്‍ വായ്‌പ അനുവദിച്ച് നല്‍കാമെന്നും മാനേജര്‍ മറുപടി നല്‍കുകയായിരുന്നു.
കൂടാതെ ജനങ്ങള്‍ക്കായി പ്രധാനമന്ത്രി പലതും പ്രഖ്യാപിക്കും. അതൊന്നും നല്‍കാന്‍ സാധിക്കില്ലെന്നും ബാങ്ക് മാനേജര്‍ അറിയിച്ചു. പ്രധാനമന്ത്രി അനുശാസിക്കുന്നത് പോലുള്ള വായ്‌പകളൊന്നും ഇത്തരത്തില്‍ നല്‍കാന്‍ സാധിക്കില്ല. പ്രധാനമന്ത്രി അങ്ങിനെ പലതും പറയും, അതൊന്നും തങ്ങള്‍ക്ക് ബാധകമല്ല എന്നുപറഞ്ഞ് അപേക്ഷകനെ അധിക്ഷേപിക്കുകയായിരുന്നു.
ഇതിനെ തുടര്‍ന്ന് യുവമോര്‍ച്ചയുടെ നേതൃത്വത്തില്‍ റീജ്യണല്‍ മാനേജരെ ഉപരോധിച്ചു. തുടര്‍ന്ന് പ്രധാനമന്ത്രിയെ അധിക്ഷേപിച്ച് സംസാരിച്ചതിന് മാപ്പ് പറയണമെന്നും ആവശ്യപ്പെട്ടു. സംഭവം വിവാദമാതോടെ ബാങ്ക് ഉന്നത ഉദ്യോഗസ്ഥന്‍ സ്ഥലതെത്തുകയും വായ്‌പ വേണമെങ്കില്‍ രണ്ട് ദിവസത്തിനുള്ളില്‍ നല്‍കാമെന്ന് അറിയിച്ച് ഉന്നതാധികാരി തലയൂരാന്‍ ശ്രമിക്കുകയായിരിന്നു.
അമ്പതിനായിരം മുതല്‍ 10 ലക്ഷം രൂപ വരെ മുദ്രാ വായ്‌പയായി ചെറുകിട നിക്ഷേപകര്‍ക്ക് ഈടില്ലാതെ നല്‍കാമെന്നതാണ് മുദ്രാ പദ്ധതി. സംസ്ഥാനത്തെ ജനങ്ങള്‍ക്ക് പ്രധാനമന്ത്രി പ്രഖ്യാപിക്കുന്ന പദ്ധതിയുടെ ഗുണങ്ങളൊന്നും ലഭിക്കുന്നില്ലെന്ന് ആക്ഷേപം ഉയരുമ്പോഴാണ് ഈ സംഭവം പുറത്തുവരുന്നത്.
