കൊച്ചി : കോളേജുകളിലെ മനുഷ്യാവകാശ ലംഘന കേസുകളില് ഏറിയ പങ്കും ഇടതു പക്ഷ വിദ്യാര്ത്ഥി സംഘടനയായ എസ്എഫ്ഐക്കെതിരെ. ഇടതുപക്ഷ അധ്യാപക സംഘടനകളുടെ ഒത്താശയോടെയാണ് എസ്എഫ്ഐ കോളേജുകളില് ആക്രമണങ്ങളും മറ്റും നടത്തിയിട്ടുള്ളതെന്നും ആരോപണം ഉയര്ന്നിട്ടുണ്ട്.
കലാലയങ്ങളിലെ മനുഷ്യാവകാശ ലംഘനങ്ങളെക്കുറിച്ച് ജസ്റ്റിസ് പി.കെ. ഷംസുദീന്റെ നേതൃത്വത്തിലുള്ള സ്വതന്ത്ര അന്വേഷണ കമ്മിഷന്റെ മധ്യ മേഖലാ സിറ്റിങ്ങിനിടെയാണ് സംസ്ഥാനത്തെ എസ്എഫ്ഐ നേതൃത്വത്തിനെതിരെ ഇത്തരത്തില് രൂക്ഷ വിമര്ശനം ഉയര്ന്നിരിക്കുന്നത്. തിരുവനന്തപുരം യൂണിവേഴ്സിറ്റി കോളജിലെ പെണ്കുട്ടിയുടെ ആത്മഹത്യ ശ്രമത്തെ തുടര്ന്നാണു ഹൈക്കോടതി മുന് ന്യായാധിപന് അധ്യക്ഷനായ സ്വതന്ത്ര കമ്മിഷന് അന്വേഷണം ആരംഭിച്ചത്. കൊച്ചിയില് കമ്മീഷന്റെ രണ്ടാം സിറ്റിങ്ങിനിടെയാണ് ആരോപണം ഉയര്ന്നത്.
കെഎസ്യു, എബിവിപി, ഫ്രറ്റേണിറ്റി, എഐഡിഎസ്ഒ, പിഎസ്യു എന്നീ വിദ്യാര്ഥി സംഘടനാ പ്രതിനിധികള് സിറ്റിങ്ങിനെത്തിയെങ്കിലും എസ്എഫ്ഐ പ്രതിനിധികളാരും പങ്കെടുത്തില്ല. തിരുവനന്തപുരത്തു നടന്ന ആദ്യ സിറ്റിങ്ങിലും എസ്എഫ്ഐ പങ്കെടുത്തിരുന്നില്ല. എസ്എഫ്ഐക്കു മേധാവിത്തമുളള ക്യാംപസുകളില് മറ്റു സംഘടനകള്ക്കു പ്രവര്ത്തന സ്വാതന്ത്യം പോലും അനുവദിക്കുന്നില്ലെന്നും മറ്റ് വിദ്യാര്ത്ഥി സംഘടനകള് കമ്മിഷനു മുമ്പാകെ പരാതിപ്പെട്ടിട്ടുണ്ട്.
എറണാകുളം മഹാരാജാസ് കോളജ്, ഗവ.ലോ കോളജ്, കുസാറ്റ്, എംജി യൂണിവേഴ്സിറ്റി ക്യാംപസ് എന്നിവിടങ്ങളില് നിന്നുള്ള വിദ്യാര്ത്ഥികളും പരാതിയുമായി എത്തി. കോളേജ് ഹോസ്റ്റലുകളില് പുറത്തു നിന്നുള്ള ക്രിമിനല് കേസ് പ്രതികള് വരെ താമസമാക്കിയിട്ടും നടപടിയില്ല, കോളജ് അധികൃതരോടും പോലീസിനോടും പരാതിപ്പെട്ടാലും നടപടി ഉണ്ടാവുന്നില്ലെന്നും വിദ്യാര്ത്ഥികള് പറഞ്ഞു. കുസാറ്റിലെ അധ്യാപകരുടെയും ജീവനക്കാരുടെയും സംഘടനകള്, ഓള് ഇന്ത്യ സേവ് എജ്യുക്കേഷന് കമ്മിറ്റി, ഡമോക്രാറ്റിക് ലോയേഴ്സ് ഫോറം തുടങ്ങിയവയുടെ പ്രതിനിധികളും പങ്കെടുത്തു.
