ഇടുക്കി: നെടുങ്കണ്ടം കസ്റ്റഡി മരണക്കേസില് രണ്ട് പോലീസ് ഉദ്യോഗസ്ഥര് അറസ്റ്റിലായി. എസ്ഐ ബാബുവും സിവില് പോലീസ് ഓഫീസര് സജീവ് ആന്റണിയുമാണ് അറസ്റ്റിലായിരിക്കുന്നത്. എസ്ഐ ബാബു കുഴഞ്ഞു വീണു. ഇദ്ദേഹത്തെ കോട്ടയം മെഡിക്കല് കോളജിലേക്ക് കൊണ്ടുപോയതായും റിപ്പോര്ട്ടുണ്ട്.
കസ്റ്റോഡിയല് ടോര്ച്ചര് എന്നു തുടങ്ങിയ വകുപ്പുകള് ചേര്ത്താണ് ഇവരെ അറസ്റ്റ് ചെയ്തിരിക്കുന്നത്. ഈ കസ്റ്റഡി മരണത്തില് മറ്റാരുടെയെങ്കിലും ഇടപെടലുണ്ടായിരുന്നോ എന്നതടക്കമുള്ള കാര്യങ്ങള് അന്വേഷണപരിധിയിലുണ്ടെങ്കിലും നിലവില് നേരിട്ട് പങ്കെടുത്തവരെയാണ് പോലീസ് ലക്ഷ്യം വെക്കുന്നത്. ഡിവൈഎസ്പി, എസ്പി എന്നിവരുടെ പങ്കിനെക്കുറിച്ചും ആരോപണങ്ങള് നിലവിലുണ്ട്.
കേസ് ഇതുവരെ ചാര്ജ് ചെയ്തിട്ടില്ല. എട്ട് പോലീസുകാരെ സസ്പെന്ഡ് ചെയ്തിട്ടുണ്ട്. അഞ്ച് പേരെ സ്ഥലം മാറ്റിയിട്ടുമുണ്ട്. ഇവര്ക്കെതിരെയും ക്രിമിനല് കേസ്സെടുത്തിട്ടില്ലെന്നതും ശ്രദ്ധേയമാണ്. നിയമസഭയില് ചോദ്യം ചെയ്യലുകളെ പ്രതിരോധിക്കാനാണ് കേസ്സെടുക്കാതിരിക്കുന്നത് എന്ന് റിപ്പോര്ട്ടുകള് പറയുന്നു.
ഇതോടൊപ്പം വന് സാമ്പത്തിക തട്ടിപ്പ് സംബന്ധിച്ച കാര്യങ്ങളിലേക്ക് അന്വേഷണം ഇപ്പോഴും വന്നിട്ടില്ല. ആരെല്ലാമാണ് രാജ്കുമാറിനെ കസ്റ്റഡിയെടുക്കേണ്ടി വന്ന സാഹചര്യത്തിലേക്ക് നയിച്ചതെന്ന് അന്വേഷണത്തില് ഉള്പ്പെട്ടിട്ടില്ല. കോണ്ഗ്രസ്സുകാരാണ് രാജ്കുമാറിനെ സ്ഥലത്തെത്തിച്ചതെന്നും അവരെ പൊലീസ് അറസ്റ്റ് ചെയ്യണമായിരുന്നെന്നും മന്ത്രി എംഎം മണി പറഞ്ഞിരുന്നു. അതെസമയം സിപിഎം നേതാക്കള് നിയന്ത്രിക്കുന്ന സഹകരണ ബാങ്കുമായി ചേര്ന്നായിരുന്നു സാമ്പത്തിക തട്ടിപ്പ് നടന്നതെന്ന് റിപ്പോര്ട്ടുകളുണ്ടായിരുന്നു.
ജൂണ് 21-നാണ് തൂക്കുപാലത്തെ സാമ്പത്തിക തട്ടിപ്പ് കേസില് റിമാന്റിലായ വാഗമണ് കോലാഹലമേട് സ്വദേശി രാജ് കുമാര് പീരുമേട് സബ് ജയിലില് മരിച്ചത്. കസ്റ്റഡി മര്ദ്ദനത്തെത്തുടര്ന്നാണ് രാജ്കുമാര് മരിച്ചതെന്ന ബന്ധുക്കളുടെ ആരോപണത്തെ ശരിവയ്ക്കുന്നതായിരുന്നു പിന്നീട് വന്ന പോസ്റ്റ്മോര്ട്ടം റിപ്പോര്ട്ട്. ക്രൈംബ്രാഞ്ച് അന്വേഷണത്തിലും ഇക്കാര്യം സ്ഥിരീകരിച്ചിരുന്നു. സംഭവത്തില് പോലീസുകാര്ക്ക് ഗുരുതര വീഴ്ച പറ്റിയെന്നും കുറ്റകൃത്യം മറയ്ക്കാന് നെടുങ്കണ്ടം സ്റ്റേഷനിലെ രേഖകളില് തിരുത്തല് വരുത്തിയതും ക്രൈംബ്രാഞ്ച് കണ്ടെത്തിയിട്ടുണ്ട്.
സര്ക്കിള് ഇന്സ്പെക്ടര് ആവശ്യപ്പെട്ടിട്ട് പോലും കസ്റ്റഡിയിലായിരുന്ന രാജ്കുമാറിനെ എസ്ഐയും സംഘവും കോടതിയില് ഹാജരാക്കായില്ലെന്ന് ക്രൈംബ്രാഞ്ച് സംഘം കണ്ടെത്തിയിരുന്നു. നെടുങ്കണ്ടം സ്റ്റേഷനില് വച്ച് രാജ്കുമാര് ക്രൂരമായ കസ്റ്റഡി മരണത്തിന് ഇരയായെന്ന് സ്ഥിരീകരിക്കുന്ന ദൃക്സാക്ഷി മൊഴികളും അന്വേഷണസംഘത്തിന് ലഭിച്ചിരുന്നു.
പൊലീസ് കസ്റ്റഡിയില് രാജ്കുമാറിന് ക്രൂരമായ പീഡനം ഏല്ക്കേണ്ടി വന്നതായി പോസ്റ്റ്മോര്ട്ടം റിപ്പോര്ട്ടില് വ്യക്തമായിരുന്നു. ന്യൂമോണിയ ബാധയെ തുടര്ന്നാണ് രാജ്കുമാര് മരിച്ചതെന്നും പോസ്റ്റ്മോര്ട്ടം റിപ്പോര്ട്ടില് പറയുന്നുണ്ട്. ദിവസങ്ങളോളം രാജ്കുമാറിനെ കസ്റ്റഡിയില് വച്ച് മര്ദ്ദിച്ചതിനെ തുടര്ന്നാണ് ന്യൂമോണിയ ബാധയുണ്ടായതെന്ന നിഗമനത്തിലാണ് ക്രൈംബ്രാഞ്ച് ഇപ്പോള് ഉള്ളത്.
അതേസമയം കസ്റ്റഡിമരണത്തില് പങ്കുള്ള മറ്റു പൊലീസുകാരേയും ഉന്നത ഉദ്യോഗസ്ഥരേയും വിശദമായി ചോദ്യം ചെയ്യുകയും അറസ്റ്റ് ചെയ്യുകയും വേണമെന്ന നിലപാടിലാണ് രാജ്കുമാറിന്റെ കുടുംബം.
