ദുബായ് : ഇവന്റ് മാനേജ്മെന്റ് കമ്പനിയില് ജോലിക്കെന്ന പേരില് ദുബായിലെ ഡാന്സ് ബാറില് ജോലിക്കായി കടത്തിയ പെണ്കുട്ടികളെ കേന്ദ്രമന്ത്രി വി മുരളീധരന്റെ ഇടപെടലിലൂടെ രക്ഷപ്പെടുത്തി. വി മുരളീധരന്റെ ആവശ്യപ്രകാരം ദുബായിലെ ഇന്ത്യന് സ്ഥാനപതിയുടെ കാര്യാലയത്തില് നിന്നാണ് സത്വര നടപടിയുണ്ടായത്. ഒരു ബിജെപി പ്രവര്ത്തകന്റെ വാട്സ്ആപ് സന്ദേശത്തെ തുടര്ന്നാണ് വിദേശകാര്യ സഹമന്ത്രി ഇടപെട്ടത്.
ഇവന്റ് മാനേജ്മെന്റ് കമ്പനിയില് ജോലിയ്ക്കെന്നു പറഞ്ഞാണ് കോയമ്പത്തൂര് സ്വദേശികളായ പെണ്കുട്ടികളെ ദുബായിലെത്തിച്ചത്. എന്നാല് ദുബായില് വച്ച് ഇവരോട് ഡാന്സ് ബാറില് ജോലി ചെയ്യാന് നിര്ബന്ധിക്കുകയായിരുന്നു. പെണ്കുട്ടികളെ നിര്ബന്ധിച്ചു ഡാന്സ് ബാറില് എത്തിക്കുകയും എതിര്ത്തപ്പോള് അവരെ മുറിയില് പൂട്ടിയിടുകയും ചെയ്തു.
ചതിയിലകപ്പെട്ടു എന്ന് മനസ്സിലായ ആ കുട്ടികള് ബന്ധുവിനയച്ച മൊബൈല് സന്ദേശത്തിലാണ് വിവരം പുറം ലോകമറിഞ്ഞത്. കേരളത്തിലെ ഒരു ബിജെപി പ്രവര്ത്തകന് വഴി ഇക്കാര്യം വിദേശകാര്യ സഹമന്ത്രി ശ്രീ. വി. മുരളീധരന് വിവരമറിയുകയും ഉടനെ തന്നെ ദുബായ് ഇന്ത്യന് കോണ്സല് ജനറല് വിപുലിനെ ബന്ധപ്പെട്ട് ഈ കുട്ടികളെ രക്ഷിക്കാന് സത്വര നടപടിയെടുക്കാന് നിര്ദേശം നല്കുകയുമായിരുന്നു.
ദുബായ് പോലീസിന്റെ സഹായത്തോടെ ഈ കുട്ടികളെ രക്ഷപ്പെടുത്തുകയും ഇന്ത്യന് കോണ്സുലേറ്റില് എത്തിക്കുകയും ഈ നാലു പെണ്കുട്ടികളേയും സുരക്ഷിതമായി ഇന്ത്യയിലേക്ക് യാത്രയാക്കുകയും ചെയ്തു. വിദേശത്തുള്ള ഇന്ത്യക്കാരുടെ സുരക്ഷിതത്വത്തില് നരേന്ദ്രമോദി സര്ക്കാര് യാതൊരു വിട്ടുവീഴ്ചയ്ക്കും തയ്യാറല്ലെന്ന് വിദേശകാര്യ സഹമന്ത്രി ട്വിറ്ററിലൂടെ അറിയിച്ചു. ഇതാണ് ഇന്ത്യയില് ഭരണ രംഗത്ത് കഴിഞ്ഞ അഞ്ച് വര്ഷം കൊണ്ടുണ്ടായ മാറ്റം.
