കണ്ണൂർ: മുഖ്യമന്ത്രി പിണറായി വിജയന്റെ മണ്ഡലമായ ധർമ്മടത്ത് സിറ്റിംഗ് സീറ്റ് നിലനിർത്തി ബിജെപി. ധർമ്മടം പഞ്ചായത്തിലെ ഒമ്പതാം നമ്പർ വാർഡായ കിഴക്കേ പാലയാട് കോളനിയിലെ ഉപതെരഞ്ഞെടുപ്പിലാണ് ബിജെപി സ്ഥാനാർത്ഥി സീറ്റ് നിലനിർത്തിയത്. ഇവിടെ എൽഡിഎഫ് മൂന്നാം സ്ഥാനത്തേയ്ക്ക് പിന്തള്ളപ്പെട്ടു.
ബിജെപി സ്ഥാനാർത്ഥിയായ ദിവ്യ ചെള്ളത്താണ് ഇവിടെ വിജയിച്ചത്. 474 വോട്ടുകളാണ് ദിവ്യക്ക് ഇത്തവണ കിട്ടിയത്. ബിജെപി 474 വോട്ടുകൾ നേടിയപ്പോൾ യുഡിഎഫ് സ്ഥാനാർത്ഥിയായ പി കെ ശശിധരൻ 418 വോട്ടുകൾ നേടി. ഇടത് മുന്നണിയിൽ നിന്ന് ലോക് താന്ത്രിക് ജനതാദൾ സ്ഥാനാർത്ഥിയായ കൊക്കോടൻ ലക്ഷ്മണന് 264 വോട്ടുകളുമായി മൂന്നാം സ്ഥാനത്ത് എത്താനേ കഴിഞ്ഞുള്ളൂ.
സംസ്ഥാനത്തെ 44 തദ്ദേശസ്വയംഭരണ വാര്ഡുകളിലേക്ക് നടന്ന തിരഞ്ഞെടുപ്പില് എല്.ഡി.എഫ് 21 ഉം യു.ഡി.എഫ് 17 ഉം ബി.ജെ.പി 5 ഉം സ്വതന്ത്രര് ഒരു സീറ്റും നേടി.
ബി.ജെ.പി വിജയിച്ച വാര്ഡുകള്:(ജില്ല, പഞ്ചായത്ത്,വാര്ഡ്, സ്ഥാനാര്ത്ഥി, പാര്ട്ടി, ഭൂരിപക്ഷം എന്ന ക്രമത്തില്). തിരുവനന്തപുരം – മാറനല്ലൂര് ഗ്രാമ പഞ്ചായത്ത് – കുഴിവിള – ഹേമ ശേഖരന് – 26, ആലപ്പുഴ – ചേര്ത്തല മുനിസിപ്പാലിറ്റി – റ്റി.ഡി. അമ്പലം വാര്ഡ് – സുരേഷ് കുമാര്. വി.എ – 38, ഇടുക്കി – തൊടുപുഴ മുനിസിപ്പാലിറ്റി – മുനിസിപ്പല് ഓഫീസ് വാര്ഡ് – മായ ദിനു – 429, പാലക്കാട് – മലമ്പുഴ ഗ്രാമ പഞ്ചായത്ത് – കടുക്കാക്കുന്നം ഈസ്റ്റ് – സൗമ്യ സതീഷ് – 55, കണ്ണൂര് – ധര്മ്മടം ഗ്രാമ പഞ്ചായത്ത് – കോളനി കിഴക്കേപാലയാട് – ദിവ്യ ചെല്ലാത്ത് – 56.
യുഡിഎഫില് നിന്നും എല്ഡിഎഫ് 7 ഉം എല്.ഡി.എഫില് നിന്ന് യുഡിഎഫ് 10 ഉം ബിജെപി ഒന്നും സ്വതന്ത്രന് ഒന്നും സീറ്റുകള് പിടിച്ചെടുത്തു. സ്വതന്ത്രനില് നിന്നും ഒരു സീറ്റ് എല്.ഡി.എഫ് നേടി.
ചിറയക്കോട്, ഇടമണ്നില, മാര്ക്കറ്റ് വാര്ഡ്, നെല്ലിയ്ക്കമണ്, മുത്തുപറമ്പ്, എലിക്കുളം, സൊസൈറ്റിപ്പടി എന്നീ വാര്ഡുകള് യുഡിഎഫില് നിന്നും എല്ഡിഎഫ് പിടിച്ചെടുത്തപ്പോള് പനയംകോട്, വെള്ളംകുടി, ഓണമ്പലം, വെട്ടിയാര്, മോര്കാട്, ഇരുമാപ്ര, കിടങ്ങൂര്, കിള്ളിമംഗലം പടിഞ്ഞാറ്റുമുറി, പൂപ്പത്തിവടക്ക്, ചേറ്റുവ എന്നീ വാര്ഡുകള് എല്.ഡി.എഫില് നിന്ന് യുഡിഎഫ് പിടിച്ചെടുത്തു. യുഡിഎഫില് നിന്നും റ്റി.ഡി അമ്പലം വാര്ഡ് ബിജെപിയും എല്.ഡി.എഫ് സ്വതന്ത്രനില് നിന്ന് വലവൂര് ഈസ്റ്റ് സ്വതന്ത്രനും നേടി.
എല്ഡിഎഫ് 24 യുഡിഎഫ് 15 ബിജെപി 4 സ്വതന്ത്രര് ഒന്ന് എന്നിങ്ങനെയായിരുന്നു നിലവിലെ കക്ഷിനില.
