തൃപ്പൂണിത്തുറ: കുടിവെള്ള പൈപ്പുകളുടെ അറ്റകുറ്റപണികള്ക്കായി ജലഅതോറിറ്റി ഇടയ്ക്കിടെ റോഡ് കുഴിക്കുന്നത് യാത്രക്കാരെ വലയ്ക്കുന്നു. എസ്.എന് ജങ്ഷനില് നിന്നും വൈക്കം ഭാഗത്തേക്ക് തിരിയുന്നിടത്ത് റോഡില് വന് ഗര്ത്തങ്ങളാണുള്ളത്. ഈ ഭാഗത്ത് കുടിവെള്ള പൈപ്പ് പൊട്ടുന്നത് നിത്യസംഭവമാണ്. എസ്.എന്. ജങ്ഷനിലെ സിഗ്നല് കടന്ന് തൃപ്പൂണിത്തുറ ഭാഗത്തേക്ക് തിരിയുന്നയിടത്ത് തന്നെയാണ് വാഹനയാത്രക്കാരെ അപകടത്തിലാക്കുന്ന ഈ കുഴി.
ഇരുചക്രവാഹനങ്ങള്, ഓട്ടോറിക്ഷ പോലെയുള്ള വാഹനങ്ങള് കുഴി മറികടക്കാന് പെട്ടെന്ന് വെട്ടിക്കുന്നത് അപകടങ്ങള്ക്കും ഇടയാക്കുന്നു. എറണാകുളം ഭാഗത്ത് നിന്നും തൃപ്പൂണിത്തുറ ഭാഗത്തേക്ക് അമിതവേഗത്തില് തിരിയുന്ന സ്വകാര്യ ബസ്സുകളില് നിന്ന് രക്ഷനേടുമ്പോള് ഇരുചക്രവാഹന യാത്രക്കാര് പലരും കുഴിയില് ചാടുകയാണ് പതിവ്.
അധികൃതര് കുടിവെള്ള പൈപ്പിന്റെ അറ്റകുറ്റപണികള് തീര്ത്ത് റോഡ് ടാര് ചെയ്യാത്തതാണ് ഈ ദുരവസ്ഥയ്ക്ക് കാരണം. ഈ ഭാഗത്ത് പൈപ്പുകള് പൊട്ടുന്നതും പതിവാണ്. കുത്തി പൊളിക്കുന്ന റോഡുകള് നന്നാക്കുന്നതിനായി ജല അതോറിട്ടി മുന്കൂര് നല്കുന്ന പണം പൊതുമരാമത്ത് വകുപ്പ് വഴിവിട്ട് ചെലവഴിക്കുന്നതാണ് റോഡിന്റെ ശോചനീയ അവസ്ഥയക്ക് പ്രധാന കാരണമെന്ന് നാട്ടുകാര് ആരോപിക്കുന്നു.
നഗരത്തിലെ റോഡുകള്ക്കടിയിലൂടെയുള്ള കുടിവെള്ള പൈപ്പുകള് കാലപ്പഴക്കം ചെന്നവയും വാല്വുകള് പലതും തുരുമ്പെടുത്ത് ജീര്ണ്ണാവസ്ഥയിയിലുള്ളതുമാണെന്ന് വാട്ടര് അതോറിറ്റി അധികൃതര് തന്നെ സമ്മതിക്കുന്നുണ്ട്. ഇത് മൂലം റോഡിനടിയിലൂടെയുള്ള പെപ്പുകള് പൊട്ടി കുടിവെള്ളം പാഴാകുന്നത് കൂടാതെ റോഡും തകരുന്നു. എന്നിട്ടും ജനപ്രതിനിധികളുടെ ഭാഗത്ത് നിന്നും ബന്ധപ്പെട്ട വകുപ്പുകളില് സ്വാധീനം ചെലുത്തി പുതിയ പൈപ്പുകളും വാല്വുകളും ലഭിക്കുന്നതിനുള്ള നടപടികള് ഉണ്ടാവുന്നില്ലെന്നാണ് ജല അതോറിറ്റി പറയുന്നത്.
മഴക്കാലത്ത് വടക്കേക്കോട്ട മുതല് എസ് എന് ജങ്ഷന് വരെയുള്ള കുഴികള് മൂടിയിരിക്കുന്നത് മെറ്റല് പൊടികളും മണ്ണും ഉപയോഗിച്ചാണ്. എന്നാല് വെയില് തെളിഞ്ഞതോടെ ഈ റോഡില് പൊടിശല്യവും രൂക്ഷമായി. രാവിലെ മുതല് ഈ ഭാഗത്ത് ഡ്യൂട്ടി ചെയ്യുന്ന പോലീസിനും ഹോം ഗാര്ഡുകള്ക്കും ഇത് മൂലം ശ്വാസം മുട്ടലും, കണ്ണുകള്ക്ക് അലര്ജിയും ത്വക്ക് രോഗങ്ങളും അനുഭവപ്പെടുന്നു. പലര്ക്കും പൊടിശല്യം മൂലം സ്ഥിരമായി ഇവിടെ ഡ്യൂട്ടിയില് നില്ക്കാന് തന്നെ സാധിക്കുന്നില്ല. ഈ ഭാഗത്തെ കച്ചവടക്കാരുടെ സ്ഥിതിയും മറിച്ചല്ല. പൊടി ശല്യം കാരണം ഈ ഭാഗത്തെ ഹോട്ടലുകളിലും, ശീതളപാനീയ കടകളിലെയും കച്ചവടം ഗണ്യമായി കുറഞ്ഞതായി കച്ചവടക്കാര് പറഞ്ഞു. വെയില് തെളിഞ്ഞതോടെ ചെറിയ മെറ്റലുകളും, മെറ്റല് പൊടിയും റോഡിനു മുകളില് കിടക്കുന്നതിനാല് ഇരുചക്ര വാഹനങ്ങള് തെന്നി വീണ് അപകടം ഉണ്ടാകുന്നതും പതിവാണ്.
