മട്ടാഞ്ചേരി: കടലേറ്റത്തില് നാശമുണ്ടായെങ്കിലും ഫോര്ട്ടുകൊച്ചിയില് ചരിത്ര സ്മാരകാവശിഷ്ടം ഇമാനുവല് കോട്ടയുടെ അടിത്തറ ഉയര്ന്നുവന്നു. ഫോര്ട്ടുകൊച്ചി തീരത്ത് രണ്ടാം പുലിമുട്ടിന് സമീപം ഗണ്ണറിക്കടുത്തായാണ് ഇമാനുവല് കോട്ടയുടെ അവശിഷ്ടം കണ്ടെത്തിയത്.
ഫോര്ട്ട്കൊച്ചിയെന്ന പേരിന്റെ ചരിത്ര രേഖയാണ് ഇമ്മാനുവല് കോട്ട. 1503ല് യൂറോപ്പുകാര് നിര്മിച്ച കോട്ട കേരളത്തിലെ ആദ്യ കോട്ടകളിലൊന്നായാണ് വിലയിരുത്തുന്നത്. അറബിക്കടലിന്റെ സൗന്ദര്യം ആസ്വദിക്കാന് സൗകര്യമൊരുക്കിയായിരുന്നു കൊച്ചിയുടെ തീരത്ത് ഇമാനുവല് കോട്ടയുടെ നിര്മാണം. 1666ല് ഡച്ചുകാര് കോട്ട തകര്ത്തു. വര്ഷങ്ങള്ക്ക് ശേഷവും ഇതിന്റെ അവശിഷ്ടം കൊച്ചി തീരത്തുണ്ടായിരുന്നു.
പില്ക്കാലങ്ങളില് അവഗണനയെ തുടര്ന്ന് കോട്ടയുടെ അടിത്തറ മണ്ണിനടിയിലായതോടെ ചരിത്ര സ്മാരകം വിസ്മൃതിയിലായി. 2004ല് കോട്ടയുടെ മറ്റൊരു അവശിഷ്ടത്തിലാണ് കടല്ഭിത്തി നിര്മിച്ചതെന്ന പരാതി ഉയര്ന്നിരുന്നു. തീരത്തുയര്ന്ന കോട്ടയുടെ അവശിഷ്ടം സംരക്ഷിക്കണമെന്ന് ജനകീയ സംഘടനകളും ചരിത്രകാരന് എം.എം. സലീമും ആവശ്യപ്പെട്ടു.
