കൊച്ചി : നിപ രോഗലക്ഷണത്തെ തുടര്ന്ന് ചികിത്സയിലായിരുന്ന മൂന്ന് പേര്ക്ക് കൂടി രോഗം ഇല്ലെന്ന് പരിശോധനാ ഫലം. കളമശേരി, തൃശൂര്, ഇടുക്കി എന്നിവിടങ്ങളില് നിന്നുള്ളവരുടെ സാംപിളുകള് പൂനെ വൈറോളജി ഇന്സ്റ്റിറ്റ്യൂട്ടില് പരിശോധിച്ചതില് നെഗറ്റീവാണെന്നാണ് റിസല്ട്ട് സൂചിപ്പിക്കുന്നത്.
കളമശേരിയില് നിന്ന് പുനഃപരിശോധനയ്ക്ക് അയച്ച രണ്ട് പേരുടെ സാമ്പിളുകളും നെഗറ്റീവ് ആയി. വൈറസ് ബാധയെന്ന സംശയത്തില് ചികിത്സയില് കഴിയുന്ന എല്ലാവരുടെയും പരിശോധനാ ഫലം ഇതോടെ പുറത്തായി. നിരീക്ഷണത്തില് കഴിയുന്ന 329 പേര്ക്കും നിപാ ലക്ഷണങ്ങളില്ല.
നിപ ബാധിതനായ യുവാവിന്റെ ആരോഗ്യനിലയും തൃപ്തികരമാണ്. കടുത്ത മസ്തികജ്വരം ഉണ്ടായിരുന്ന യുവാവിന്റെ പനി കുറഞ്ഞ് സ്വയം നടക്കാനായി. അതായത് വൈറസ് ബാധ കണ്ടെത്തിയ ദിനം മുതല് ഉള്ള ഇരുപത്തിയൊന്ന് ദിന ഇന്ക്യുബേഷന് കാലാവധി കൂടി മറികടക്കേണ്ടതുണ്ട്. ഇനി 12 ദിവസം കൂടി യുവാവ് നിരീക്ഷണത്തില് കഴിഞ്ഞാല് മതി.
