കോട്ടയം: ഇന്ത്യന് ഭൂപടവും ദേശീയപതാകയും വികൃതമാക്കി ഐഎസ് ഭീകരര് കേരളത്തില് പ്രചരിപ്പിക്കുന്നു. ഇന്ത്യന് ഭൂപടം ഐഎസ് സാമ്രാജ്യമാക്കി രൂപമാറ്റം വരുത്തിയാണ് പ്രചാരണം. ഇത്തരത്തില് പ്രചരിപ്പിക്കാന് തയാറാക്കിയ ഭൂപടത്തിന്റെ പ്രിന്റുകള് കഴിഞ്ഞ മാസങ്ങളില് നടത്തിയ റെയ്ഡുകളില് പിടിച്ചെടുത്തു.
ഇന്ത്യന് ഭൂപടത്തില് രൂപമാറ്റം വരുത്തി പൂര്ണമായും കറുത്തനിറം കൊടുത്ത ശേഷം വെള്ളനിറത്തില് ഐഎസ് എന്ന് രേഖപ്പെടുത്തിയാണ് പ്രചരിപ്പിക്കുന്നത്. കശ്മീര് അടക്കമുള്ള പല സ്ഥലങ്ങളിലും ഐഎസ് ശ്രദ്ധ പതിപ്പിച്ചതിന്റെ തെളിവുകള് എന്ഐഎ പിടിച്ചെടുത്ത രേഖകളിലുണ്ട്. ഭൂപടത്തിന്റെ പല ഭാഗങ്ങളിലും പ്രത്യേക കോഡുകള് രേഖപ്പെടുത്തിയിട്ടുണ്ട്. ഭൂപടത്തിന്റെ പ്രിന്റ് സഹിതം കേരളത്തിലെ ഭീകര റിക്രൂട്ട്മെന്റിന്റെ തെളിവുകള് 11ന് എന്ഐഎ കൊച്ചിയിലെ പ്രത്യേക കോടതിയില് സമര്പ്പിക്കും.
കേരളത്തില് ഐഎസ് അനുകൂല രഹസ്യയോഗങ്ങള് ചേര്ന്നവര് തന്നെയാണ് വിധ്വംസക പ്രവര്ത്തനങ്ങളുടെ പിന്നിലുമുള്ളത്. സ്ലീപ്പര്സെല്ലുകളില് കണ്ണികളായവരാണ് ഇത് പ്രചരിപ്പിച്ചതിന് പിന്നിലുള്ളതെന്നും കണ്ടെത്തി. ഇതോടൊപ്പം കേരളത്തിലെ ഐഎസ് ഭീകരര് നടത്തിയ രാജ്യവിരുദ്ധ വ്യക്തിഗത സന്ദേശങ്ങളും എന്ഐഎ പിടിച്ചെടുത്തവയില് ഉള്പ്പെടുന്നു. ഭീകരെ പിന്തുണയ്ക്കുന്ന കേരളത്തിലെ സംഘടനകള്ക്ക് സ്വാധീനമുള്ള കേന്ദ്രങ്ങളിലെല്ലാം ഐഎസ് സാമ്രാജ്യമാക്കി അവതരിപ്പിച്ച ഭാരത ഭൂപടം എത്തിച്ചതായാണ് വിവരം.
കേരളത്തിലെത്തിയ ഐഎസ് ഭീകരര് ഓണ്ലൈന് ബുക്കിങ് റൂമുകളെയും, ഹോം സ്റ്റേകളെയും താവളമാക്കിയതായി അന്വേഷണസംഘം കണ്ടെത്തിയിരുന്നു. അനുബന്ധ അന്വേഷണങ്ങളിലും കേരളത്തിലെ ഭീകരരുടെ സ്വാധീനം വ്യക്തമാക്കുന്ന നിരവധി വിവരങ്ങള് ലഭിച്ചിരുന്നു. ഇതിനൊപ്പമാണ് പുതിയ വിവരങ്ങള്കൂടി പുറത്തുവരുന്നത്.
ജന്മഭൂമി ഓണ്ലൈന്