ന്യൂദല്ഹി: ന്യൂനപക്ഷങ്ങളുടെ ക്ഷേമത്തിന് വേണ്ടി പ്രവര്ത്തിക്കാനുള്ള പ്രധാനമന്ത്രി നരേന്ദ്ര മോദിയുടെ ആഹ്വാനത്തെ സ്വാഗതം ചെയ്ത് പ്രമുഖ മുസ്ളീം ബുദ്ധിജീവികള്. മുസ്ളീങ്ങളുടെ വിദ്യാഭ്യാസ പിന്നോക്കാവസ്ഥ, നൈപുണ്യവികസനം, ആത്മവിശ്വാസം വളര്ത്തല് തുടങ്ങിയ കാര്യങ്ങളില് മോദിക്കൊപ്പം സഹകരിച്ച് പ്രവര്ത്തിക്കാമെന്നും മോദിക്കയച്ച കത്തില് അവര് വാഗ്ദാനം ചെയ്യുന്നു.
മെയ് 26ന് മോദി പാര്ലമെലന്റ് ഹാളില് നടത്തിയ പ്രസംഗത്തെ സ്വാഗതം ചെയ്യുന്നു. സമൂഹത്തിലെ എല്ലാ തുറകളിലും പെട്ടവര്ക്കു വേണ്ടി പ്രവര്ത്തിക്കുമെന്നും പാര്ശ്വവല്ക്കരിക്കപ്പെട്ടവരെ മുഖ്യധാരയിലേക്ക് കൊണ്ടുവരുമെന്നും അങ്ങനെ ഇന്ത്യയെ ലോകത്തെ മൂന്നാമത്തെ സാമ്പത്തിക ശക്തിയാക്കി മാറ്റുമെന്നുമാണ് അന്ന് മോദി പ്രസംഗിച്ചത്. ഭരണഘടനയും നിയമവും അനുസരിച്ച് ന്യൂനപക്ഷങ്ങള്ക്ക് സംരക്ഷണം ഉറപ്പാക്കുമെന്നും അവരുടെ ആത്മവിശ്വാസം വളര്ത്താന് നടപടി എടുക്കുമെന്നും മോദി പറഞ്ഞു. ഇതിനെ സ്വാഗതം ചെയ്യുന്നു. കത്തില് അവര് വ്യക്തമാക്കി. ന്യൂനപക്ഷങ്ങള് അനുഭവിക്കുന്ന പ്രശ്നങ്ങള്, പ്രത്യേകിച്ച് വിദ്യാഭ്യാസ, ആരോഗ്യമേഖലകളില്, താങ്കള് കൃത്യമായി ചൂണ്ടിക്കാട്ടിയിട്ടുമുണ്ട്. ന്യൂനപക്ഷങ്ങളെ ദേശീയ മുഖ്യധാരയിലേക്ക് കൊണ്ടുവരാനും അങ്ങനെ ഇന്ത്യയെ മൂന്നാമത്തെ സാമ്പത്തിക ശക്തിയായി മാറ്റുകയെന്ന സ്വപ്നം സാക്ഷാത്കരിക്കാനും ഈ രണ്ടു രംഗങ്ങളിലും മുസ്ളീങ്ങളുടെ പുരോഗതി അത്യാവശ്യമാണ്. കത്തില് തുടരുന്നു.
ഹൈദരാബാദ് നാഷണല് ലോ കോളേജ് വൈസ് ചാന്സലര് ഫൈസാന് മുസ്തഫ, മെസ്കോ ഗ്രൂപ്പ് ചെയര്മാന് ഫക്രൂദിന് മുഹമ്മദ്, ജമായത്ത് ഉലമാ ഇ ഹിന്ദ് മേധാവികളായ മഹ്മൂദ് മദനി, നിയാസ് ഫറൂഖി പ്രമുഖ വിദ്യാഭ്യാസ വിചക്ഷണന് പിഎ ഇനാംദാര്, കേന്ദ്ര ഹജ് കമ്മിറ്റി മുന്ചെയര്മാന് ഖ്വാസിര് ഷമീം, ദല്ഹി ന്യൂനപക്ഷ കമ്മീഷന് മുന്ചെയര്മാന് കമല് ഫറൂഖി, ജസ്റ്റിസ് സൊഹൈല് എ സിദ്ദിഖി, ജസ്റ്റിസ് എസ്എസ് പാര്ക്കര്, ഷാബി അഹമ്മദ്, സച്ചാര് കമ്മിറ്റിയംഗം എസ് സഫര് മഹ്മൂദ്, ദല്ഹി ന്യൂനപക്ഷ കമ്മീഷന് ചെയര്മാന് സഫറുള് ഇസ്ളാം തുടങ്ങിയവരാണ് മോദിക്ക് കത്തയച്ചിരിക്കുന്നത്.
പാവപ്പെട്ടവരെയും പാര്ശ്വവല്ക്കരിക്കപ്പെട്ടവരെയും മുഖ്യധാരയില് എത്തിക്കാതെ അവരുടെ മുഴുവന് ശേഷിയും വിനിയോഗിക്കാതെ താങ്കളുടെയും ദേശസ്നേഹികളായ ഓരോരുത്തരടെയും സ്വപ്നം സാക്ഷാത്ക്കരിക്കാന് ആവില്ല. കത്ത് തുടരുന്നു. മുസ്ളീം സമൂഹത്തെ വിശ്വാസത്തിലെടുക്കാനുള്ള അങ്ങയുടെ ശ്രമങ്ങള്ക്ക് മുഴുവന് സഹകരണവും ഞങ്ങള് ഉറപ്പു നല്കുന്നു. അവര് വ്യക്തമാക്കി.
