നോര്ത്ത് 24 പര്ഗാനയിലെ ബിജെപി ഓഫീസില് മമത തൃണമൂല് ചിഹ്നം വരയ്ക്കുന്നു
കൊല്ക്കത്ത: ബംഗാളിലെ അക്രമങ്ങള്ക്ക് ചുക്കാന് പിടിച്ച് മുഖ്യമന്ത്രി മമത ബാനര്ജി. പോലീസ് അകമ്പടിയോടെയെത്തിയാണ് മമത സംസ്ഥാനത്ത് പലയിടത്തും അക്രമങ്ങള്ക്ക് നേതൃത്വം നല്കുന്നത്. അക്രമങ്ങള്ക്ക് മമതയുടെ നേതൃത്വത്തില് ബിജെപി ഓഫീസ് കുത്തിത്തുറന്ന് ഭിത്തിയില് പെയിന്റ് കൊണ്ട് തൃണമൂല് ചിഹ്നം വരച്ചു. നരേന്ദ്ര മോദി പ്രധാനമന്ത്രിയായി സത്യപ്രതിജ്ഞ ചെയ്യുന്ന സമയത്താണ് നോര്ത്ത് 24 പര്ഗാനയിലെ ബിജെപി ഓഫീസ് മമതയും കൂട്ടരും അതിക്രമിച്ച് കൈയേറിയത്. ഒരു മുഖ്യമന്ത്രി നേരിട്ട് മറ്റൊരു പാര്ട്ടി ഓഫീസ് കൈയേറുന്നത് ഇതാദ്യം.
നോര്ത്ത് 24 പര്ഗാനയിലെ നയീഹതിയിലെ ഓഫീസിലെത്തിയ സംഘം വാതില് തല്ലിത്തകര്ത്ത് അകത്തു കടന്ന് കാവി പെയിന്റടിച്ച ഭാഗത്ത് തൃണമൂലിന്റെ പേരും ചിഹ്നവും വരച്ചു ചേര്ത്തു. മുന്പ് തൃണമൂലിന്റെ ഓഫീസായിരുന്ന ഇവിടം ബിജെപി പിടിച്ചെടുത്തതാണെന്നും തങ്ങള് തിരിച്ചുപിടിച്ചെന്നുമാണ് മമതയുടെ ന്യായീകരണം. ബിജെപി എംപി അര്ജുന് സിങ്ങിന്റെ നേതൃത്വത്തിലാണ് ഇവിടം കൈയേറിയതെന്നും അവര് പറയുന്നു.
മോദിയുടെ സത്യപ്രതിജ്ഞ മമത ബഹിഷ്ക്കരിച്ചിരുന്നു. അതേസമയത്ത് നയീഹിതിയില് എത്തിയ അവര് അക്രമത്തിന് നേരിട്ട് നേതൃത്വം നല്കി. ഇവിടേക്ക് പോകുന്നതിനിടെ ജയ്ശ്രീറാം വിളിച്ച ബിജെപി പ്രവര്ത്തകര്ക്കു നേരെ അവര് അതിക്രമത്തിന് മുതിര്ന്നു.
ലോക്സഭാ തെരഞ്ഞെടുപ്പില് ബിജെപി ബംഗാളില് വന്വിജയം നേടുകയും 18 സീറ്റുകള് പിടിച്ചെടുക്കുകയും ചെയ്തിരുന്നു. തൃണമൂല് യൂണിറ്റുകള് ഒന്നടങ്കം ബിജെപിയില് ചേര്ന്ന അനവധി സംഭവങ്ങള് ബംഗാളില് പലയിടത്തും ഉണ്ടായി. ഇതിനകം രണ്ട് തൃണമൂല് എംഎല്എമാരും രണ്ട് സിപിഎം എംഎല്എമാരും ബിജെപിയില് ചേര്ന്നിരുന്നു.
