തൃപ്പൂണിത്തുറ: വൈക്കം റോഡ് വികസനവുമായി ബന്ധപ്പെട്ട് ദിശാ നിര്ണയം നടത്തി അതിര്ത്തി കല്ലുകള് സ്ഥാപിച്ചതില് ഉണ്ടായിട്ടുള്ള ഗുരുതരമായ അപാകത്തില് പ്രദേശവാസികള്ക്കുള്ള ആശങ്ക അടിയന്തിരമായി പരിഹരിക്കണമെന്ന് തൃപ്പൂണിത്തുറ രാജനഗരി യൂണിയന് ഓഫ് റസിഡന്റ്സ് അസോസിയേഷന് (ട്രൂറ) അധികൃതരോട് ആവശ്യപ്പെട്ടു. 22 മീറ്റര് വീതിയില് നാലുവരി പാതയാണ് നിര്മിക്കാന് ഉദ്ദേശിക്കുന്നത്. ഇതിനായി നിലവിലുള്ള റോഡിന്റെ മധ്യഭാഗത്തു നിന്ന് ഇരുവശത്തേക്കും തുല്യമായി 11 മീറ്റര് വീതം സ്ഥലം ഏറ്റെടുത്താല് ജനങ്ങളുടെ പരാതിയും പ്രതിഷേധവും ഇല്ലാതാവുമെന്നിരിക്കെ മറ്റു ചില ഗൂഢ താല്പ്പര്യങ്ങളാണ് സ്ഥലമെടുപ്പില് നടപ്പാക്കാന് ശ്രമിക്കുന്നതെന്ന് കമ്മിറ്റി ആരോപിച്ചു.
പുതിയ ദിശാ നിര്ണയത്തിലൂടെ റോഡിന്റെ മധ്യഭാഗത്തു നിന്നും 11 മീറ്റര് വീതം മാത്രം ഇരുവശത്തേക്കും മതിയെന്നിരിക്കെയാണ് ഏക പക്ഷീയമായി ചില പ്രദേശങ്ങളില് മാത്രം ഒരു ഭാഗം പൂര്ണമായി ഒഴിവാക്കി മറുഭാഗത്ത് വീടുകള് പോലും നഷ്ടപ്പെടുന്ന രീതിയില് അതിര്ത്തി കല്ലുകള് സ്ഥാപിച്ചിരിക്കുന്നത്. പതിനാറര മീറ്റര് ഒഴിവാക്കി കെട്ടിടം നിര്മിച്ചവര്ക്കു പോലും പുതിയ സാഹചര്യത്തില് നിലവിലെ കെട്ടിടം പൊളിച്ചു മാറ്റേണ്ടതായി വരും. ഇത്തരം നടപടികള്ക്കിടയാക്കുന്ന സാഹചര്യം അംഗീകരിക്കാനാവില്ലെന്നും റോഡ് വീതി കൂട്ടുന്നതില് ഉണ്ടായിട്ടുള്ള അപാകം അടിയന്തരമായി പരിഹരിക്കണമെന്നും യോഗം ആവശ്യപ്പെട്ടു. പ്രശ്ന പരിഹാരം ഉണ്ടാകുന്നില്ലെങ്കില് ഭാവി നടപടികളെക്കുറിച്ച് ട്രൂറ ആലോചിക്കുമെന്നും ഭാരവാഹികള് പറഞ്ഞു. ട്രൂറ ചെയര്മാന് വി.പി. പ്രസാദ് അധ്യക്ഷനായി. വി.സി. ജയേന്ദ്രന്, പോള് മാഞ്ഞൂരാന്, ഷീബ ജോസഫ്, ജിജി വെണ്ടറപ്പള്ളി, ആര്. കൃഷ്ണസ്വാമി, എസ്.കെ. ജോയി, എന്.ജി. മോഹനന്, ടി.എം. വിജയന്, എം.രവി, മാധവന്കുട്ടി സംസാരിച്ചു.
