തിരുവനന്തപുരം : ലോക്സഭ തിരഞ്ഞെടുപ്പിനായി സംസ്ഥാനത്തെ സ്ഥാനാര്ത്ഥികള് സമര്പ്പിച്ച നാമനിര്ദേശ പത്രികകളുടെ സൂക്ഷ്മ പരിശോധന പൂര്ത്തിയായി. 303 നാമ നിര്ദ്ദേശ പത്രികകള് സമര്പ്പിച്ചതില് 243 എണ്ണമാണ് സ്വീകരിച്ചത്. ഏറ്റവും കൂടുതല് ആളുകള് മത്സരിക്കുന്നത് വയനാട്ടില് നിന്നാണ് 22 പേര്. സംസ്ഥാന തെരഞ്ഞെടുപ്പ് ഓഫീസര് ടിക്കാറാം മീണയാണ് ഇക്കാര്യം അറിയിച്ചത്.
2.50കോടി വോട്ടര്മാരാണ് സംസ്ഥാനത്തുണ്ടായത്. കഴിഞ്ഞമാസം 30ന് വോട്ടര് പട്ടിക പുറത്തുവിട്ടിരുന്നു. 73000 എന്ആര്ഐ വോട്ടര്മാരുണ്ട്. ഏറ്റവും കൂടുതല് യുവ വോട്ടര്മാരുള്ളത് മലപ്പുറത്താണ്, രണ്ടാമത് കോഴിക്കോടും, മൂന്നാമത് കണ്ണൂരുമാണുള്ളത്.
സംസ്ഥാനത്ത് ആകെ ഭിന്നശേഷി വോട്ടര്മാരുടെ എണ്ണം 1,25189, കോഴിക്കോട് ജില്ലയിലാണ് ഏറ്റവും കൂടുതല് ഭിന്നശേഷി വോട്ടര്മാരുള്ളത്. 100വയസിന് മുകളിലുള്ളത് 2230ന് മുകളില്. കേരളത്തിന്റെ ആരോഗ്യ നിലയെ കൂടി ഇത് സൂചിപ്പിക്കുന്നു എന്ന് അദ്ദേഹം വ്യക്തമാക്കി. സംസ്ഥാനത്ത് ആകെ 5ലക്ഷത്തിലധികം പുതിയ വോട്ടര്മാരാണുള്ളത്. 173 ട്രാന്സ്ജെന്ഡര് വോട്ടര്മാരുണ്ട്.
അതിനിടെ സംസ്ഥാനത്ത് നിന്ന് ഇതുവരെ പിടികൂടിയത് 7കോടി രൂപയാണെന്ന് ടീക്കാറാം മീണ പറഞ്ഞു. കൂടാതെ സമൂഹമാധ്യമങ്ങളില് വിവാദ പരാമര്ശങ്ങള് ഉള്പ്പെടുത്തുന്നതില് കമ്മിഷന് ഇടപെടുമെന്നും എം.കെ രാഘവന്റെ പ്രസംഗത്തിലെ പരാമര്ശത്തെ കുറിച്ച് അന്വേഷിക്കുകയാണെന്നും അദ്ദേഹം കൂട്ടിച്ചേര്ത്തു
