കൊച്ചി: എറണാകുളം ജില്ലയിലെ അംഗന്വാടികള്ക്ക് നാളെ മുതല് പത്ത് ദിവസം ജില്ലാ കളക്ടര് മുഹമ്മദ് വൈ സഫിറുള്ള അവധി പ്രഖ്യാപിച്ചു. വേനല്ചൂട് കണക്കിലെടുത്താണ് അടിയന്തര നടപടി. ഏപ്രില് 6 വരെ അവധി ആയിരിക്കുമെന്ന് ജില്ലാ കളക്ടര് അറിയിച്ചു.
സൂര്യാഘാതം കുട്ടികളെ വളരെപ്പെട്ടന്ന് ബാധിക്കും. സൂര്യാഘാതം സംഭവിക്കുന്നത് ഒഴിവാക്കാന് പകല് പതിനൊന്ന് മണിമുതല് വൈകീട്ട് മൂന്ന് മണിവരെ സൂര്യപ്രകാശം ഏല്ക്കുന്നത് ഒഴിവാക്കണമെന്ന് ദുരന്ത നിവാരണ അതോറിറ്റി മുന്നറിയിപ്പ് നല്കിയിരുന്നു. രോഗബാധിതര് ഈ സമയത്ത് സൂര്യപ്രകാശം ഏല്ക്കുന്നത് ഒഴിവാക്കണമെന്നും കുട്ടികളെ അവധി പ്രമാണിച്ച് വിനോദ സഞ്ചാരത്തിന് കൊണ്ടുപോകുന്ന സ്കൂളുകള് 11 മുതല് 3 വരെ കുട്ടികള്ക്ക് നേരിട്ട് ചൂട് ഏല്ക്കുന്നില്ല എന്ന് ഉറപ്പ് വരുത്തണമെന്നും നിര്ദ്ദേശമുണ്ട്.
അംഗനവാടി കുട്ടികള്ക്ക് ചൂട് ഏല്ക്കാത്ത തരത്തിലുള്ള സംവിധാനം നടപ്പാക്കാന് അതാത് പഞ്ചായത്ത് അധികൃതരും അംഗനവാടി ജീവനക്കാരും പ്രത്യേകം ശ്രദ്ധിക്കണമെന്നും ദുരന്തനിവാരണ അതോറിറ്റി നിര്ദ്ദേശിച്ചിരുന്നു. ഈ അവസരത്തില് ചൂട് കുറയാത്തതിനാലും സംസ്ഥാനത്ത് നിരവധി ആളുകള്ക്ക് സൂര്യാഘാതം ഏറ്റതുകൊണ്ടുമാണ് കലക്ടറുടെ നടപടി.
