കോട്ടയം: ജനപക്ഷം പത്തനംതിട്ടയില് മത്സരിക്കുമെന്ന് പി.സി. ജോര്ജ്. രമേശ് ചെന്നിത്തലയും, ഉമ്മന്ചാണ്ടിയും, മുല്ലപ്പള്ളി രാമചന്ദ്രനും തങ്ങളെ വഞ്ചിച്ചു. തങ്ങള്ക്കുതന്ന ഉറപ്പ് പാലിക്കാന് യൂഡിഎഫ് തയാറായിട്ടില്ലെന്നും ജോര്ജ് പറഞ്ഞു.
യുഡിഎഫുമായി സഹകരിക്കാന് ജനുവരി 12ന് ഞങ്ങള് കത്ത് കൊടുത്തു. ചര്ച്ചകള്ക്ക് തിരുവനന്തപുരത്തെത്താന് കോണ്ഗ്രസ് നേതാക്കള് ആവശ്യപ്പെട്ടു. അവിടെ എത്തിയപ്പോള് ആലുവാ പാലസില് എത്താന് പറഞ്ഞു. അവിടെയെത്തിയപ്പോള് നെടുമ്പാശേരി വിമാനത്താവളത്തിന് സമീപമുള്ള ഹോട്ടലില് എത്താന് പറഞ്ഞു. അങ്ങനെ രമേശ് ചെന്നിത്തലയുമായി നടത്തിയ ചര്ച്ചയില് ഒരു തീരുമാനവുമുണ്ടായില്ല, ജോര്ജ് പറഞ്ഞു.
ഗ്രൂപ്പ് വഴക്കും വര്ഗീയതയുമാണ് കോണ്ഗ്രസില്. മതവിശ്വാസങ്ങളെ തകര്ക്കാനാണ് സിപിഎം ശ്രമിക്കുന്നത്. ശബരിമലയില് എന്തൊക്കെ ക്രൂരതയാണ് സംസ്ഥാന സര്ക്കാര് കാണിച്ചത്. ക്രിസ്തുമത വിശ്വാസത്തെ തകര്ക്കാന് സംസ്ഥാന സര്ക്കാര് ചര്ച്ച് ആക്ട് കൊണ്ടുവന്നു.
26ന് രണ്ടിന് കോട്ടയം സിഎസ്ഐ റിസ്ട്രീറ്റ് സെന്ററില് നടക്കുന്ന സമ്മേളനത്തില് സ്ഥാനാര്ഥി പ്രഖ്യാപനമുണ്ടാകുമെന്നും അദ്ദേഹം പറഞ്ഞു. വാര്ത്താസമ്മേളനത്തില് ഹസന് കുട്ടി, എസ്. ഭാസ്കരപിള്ള, മാത്യൂസ് എന്നിവര് പങ്കെടുത്തു.
