കൊല്ലം : ഓച്ചിറയില് വഴിയോരക്കച്ചവടക്കാരായ രാജസ്ഥാന് നിന്നുള്ള ദമ്പതികളെ മര്ദ്ദിച്ചവശരാക്കിയശേഷം മകളെ തട്ടിക്കൊണ്ടു പോയി. പതിമൂന്ന് വയസുള്ള പെണ്കുട്ടിയെ ഇന്നലെ ഒരു സംഘം ആളുകള് ചേര്ന്ന് തട്ടിക്കൊണ്ടുപോവുകയായിരുന്നു.
പ്ലാസ്റ്റര് ഓഫ് പാരീസ് ഉപയോഗിച്ച് വിഗ്രഹങ്ങള് ഉണ്ടാക്കി വില്ക്കുന്ന കുടുംബമാണ് ഇവരുടേത്. ഓച്ചിറ- വലിയകുളങ്ങര പ്രദേശത്ത് ഒരുമാസമായി ഇവര് വഴിയോരക്കച്ചവടം നടത്തി വരികയായിരുന്നു. ഇന്നലെ രാത്രി 11 മണിക്ക് ഒരു സംഘമാളുകള് ഇവര് താമസിക്കുന്ന ഷെഡ്ഡില് അതിക്രമിച്ച് കയറി പെണ്കുട്ടിയെ പിടിച്ചുകൊണ്ടുപോകാന് ശ്രമിച്ചു. തടയാന് ശ്രമിച്ചപ്പോള് അച്ഛനമ്മമാരെ മര്ദ്ദിച്ചു. അവശരാക്കി വഴിയില്ത്തള്ളിയ ശേഷം പെണ്കുട്ടിയെ തട്ടിക്കൊണ്ടുപോവുകയായിരുന്നു.
നാട്ടില്ത്തന്നെയുള്ള ചിലര് പലപ്പോഴും ഉപദ്രവിക്കാറുണ്ടെന്ന് അച്ഛനമ്മമാര് പോലീസില് പരാതി നല്കി. പ്രദേശവാസികളായ നാല് യുവാക്കളാണ് ഉപദ്രവിക്കാറുള്ളതെന്നും അക്രമത്തിന് പിന്നിലാരാണെന്ന് വ്യക്തമല്ലെന്നും അച്ഛനമ്മമാര് അറിയിച്ചു.
അതേസമയം സംഭവത്തില് ഇന്ന് രാവിലെ പോലീസില് പരാതി നല്കിയെങ്കിലും പൊലീസുകാര് നടപടിയെടുത്തില്ലെന്നും ആരോപണം ഉയര്ന്നിട്ടുണ്ട്. തുടര്ന്ന് നാട്ടുകാര് സ്റ്റേഷനിലെത്തി ബഹളമുണ്ടാക്കിയതോടെയാണ് പോലീസ് അന്വേഷണം ആരംഭിച്ചത്. കൊല്ലം എസിപിയാണ് അന്വേഷണത്തിന് നേതൃത്വം നല്കുന്നത്. എന്നാല് പെണ്കുട്ടി ഇപ്പോള് എവിടെയുണ്ടെന്നതുള്പ്പടെയുള്ള വിവരങ്ങള് പോലീസിന് ഇതുവരെ കണ്ടെത്താനായിട്ടില്ല.
