വല്ലഡോളിഡ്: തുടര്ച്ചയായ തോല്വികള്ക്ക് ഫുള്സ്റ്റോപ്പിട്ട് റയല് മാഡ്രിഡ് വിജയവഴിയില് കയറി. തുടര്ച്ചയായി മൂന്ന് മത്സരങ്ങളില് തോറ്റ റയല് ലാ ലിഗയില് ഒന്നിനെതിരെ നാല് ഗോളുകള്ക്ക് വല്ലഡോളിഡിനെ പരാജയപ്പെടുത്തി. അവസാന നിമിഷങ്ങളില് പത്ത്പേരുമായി പൊരുതിയാണ് റയല് വിജയം പിടിച്ചെടുത്തത്. കരീം ബെന്സേമയുടെ ഇരട്ട ഗോളാണ് റയലിന് വിജയമൊരുക്കിയത്്.
റയലിനെതിരെ പൊരുതി വല്ലഡോളിഡിന് തൊട്ടെതെല്ലാം പിഴച്ചു. പെനാല്റ്റി നഷ്ടപ്പെടുത്തി അവര് രണ്ട് തവണ റയലിന്റെ വലയില് പന്തെത്തിച്ചു. പക്ഷെ രണ്ട് തവണയും റഫറി ഗോള് അനുവദിച്ചില്ല.
29-ാം മിനിറ്റില് തുഹാമിയുടെ ഗോളില് വല്ലഡോളിഡ് ലീഡ് നേടി. അഞ്ചു മിനിറ്റിനുള്ളില് റയല് ഗോള് മടക്കി. വരാനെയാണ് ലക്ഷ്യം കണ്ടത്. ഇടവേളയ്ക്ക് ഇരു ടീമുകളും ഒപ്പത്തിനൊപ്പം (1-1) നിന്നു. രണ്ടാം പകുതിയില് ബെന്സേമ രണ്ട്് തവണ വലകുലുക്കിയതോടെ റയല് 3-1 ന് മുന്നിലായി. ആദ്യം പെനാല്റ്റി ഗോളാക്കിയ ബെന്സേമ കോണറില് തലവെച്ച് രണ്ടാം ഗോളും നേടി.
തുടര്ന്ന് രണ്ട് തവണ മഞ്ഞകാര്ഡ് കണ്ട റയല് താരം കസീമിറോയെ പുറത്താക്കി. പത്ത്പേരുമായി പൊരുതിയ റയല് കളിയവസാനിക്കാന് അഞ്ചു മിനിറ്റുള്ളപ്പോള് നാലാം ഗോളും കുറിച്ചു. ലൂക്കാ മോഡ്രിച്ചാണ് ലക്ഷ്യം കണ്ടത്.
ഈ വിജയത്തോടെ റയല് 27 മത്സരങ്ങളില് 51 പോയിന്റുമായി മൂന്നാം സ്ഥാനത്തേക്ക് ഉയര്ന്നു. 27 മത്സരങ്ങളില് 63 പോയിന്റുള്ള ബാഴ്സലോണയാണ് ഒന്നാം സ്ഥാനത്ത്.
