കൊച്ചി: ചോറ്റാനിക്കര ദേവീക്ഷേത്രത്തില് ഗുരുതി ബ്ലീച്ചിങ് പൗഡറിട്ട് തയ്യാറാക്കിയ സംഭവത്തില് കൊച്ചിന് ദേവസ്വം ബോര്ഡ് വിജിലന്സ് പ്രാഥമികാന്വേഷണം ആരംഭിച്ചു. ദേവീക്ഷേത്രത്തിലെ കീഴ്ക്കാവില് ഭഗവതിക്ക് പ്രധാന വഴിപാടാണ് ഗുരുതി. ഞായറാഴ്ച തയ്യാറാക്കിയ 12 പാത്രം ഗുരുതിയിലാണ് ചുണ്ണാമ്പിന് പകരം ബ്ലീച്ചിങ് പൗഡറിട്ട് ഇട്ട് നല്കിയത്.
ഞായറാഴ്ച രാത്രി 8.30-നാണ് ഗുരുതരമായ സംഭവം നടന്നത്. പതിവ് ഗുരുതിയെ അപേക്ഷിച്ച് ഇതില് നിന്നും ദുര്ഗന്ധം അനുഭവപ്പെട്ടതിനെ തുടര്ന്ന് മേല്ശാന്തി ടി.എന്. നാരായണന് നമ്പൂതിരിക്ക് സംശയം തോന്നി ഇത് ഭഗവതിക്ക് തര്പ്പണം ചെയ്യ്തില്ല. അധികൃതരെ ഉടന് അറിയിച്ചതിനെ തുടര്ന്ന് പുതിയത് തയ്യാറാക്കിച്ച ശേഷമാണ ഗുരുതി പൂജ നടത്തിയത്.
ക്ഷേത്രത്തില് കീഴ്ക്കാവ് ശാന്തി ജയപ്രകാശ് എമ്പ്രാന്തിരിയും ഈ ദിവസം ഉണ്ടായിരുന്നില്ല. ഇദ്ദേഹത്തിന്റെ സഹായികളാണ് ഉണ്ടായിരുന്നത്. ഇതേക്കുറിച്ച് ദേവസ്വം വിജിലന്സ് അന്വേഷണം തുടങ്ങി.
കീഴ്ക്കാവ് ഭഗവതിക്ഷേത്രത്തിലെ പ്രധാന വഴിപാടായ ഗുരുതി പൂജയ്ക്ക് 2025 വരെ ബുക്കിങ്ങാണ്. ഉത്സവ കാലത്തും മുടിയേറ്റ് സമയത്തും മാത്രമേ ഗുരുതി ഒഴിവാക്കാറുള്ളൂ. കീഴ്ക്കാവ് ഭഗവതിക്കായി ശ്രീകോവിലിനു മുന്നില് ഗുരുതി നിറച്ച ഓട്ടുരുളികള് വെച്ച് പ്രത്യേകം പൂജകള് നടത്തി തര്പ്പണം ചെയ്യുകയും തുടര്ന്ന് നിവേദ്യമായിട്ടുള്ള ഗുരുതി ഭക്തര്ക്ക് സേവിക്കാന് കൊടുക്കുന്നതും പതിവാണ്.
ഗുരുതിക്കൂട്ടിന് ചുണ്ണാമ്പിനു പകരം ബന്ധപ്പെട്ട ജീവനക്കാരന് കൊണ്ടുവന്നു കൊടുത്തത് ബ്ലീച്ചിംഗ് പൗഡറായിരുന്നുവെന്ന് ചോറ്റാനിക്കര ദേവസ്വം മാനേജര് ബിജുകുമാര് പറഞ്ഞു. മേല്ശാന്തി അറിയിച്ചതിനെ തുടര്ന്ന് സാധാരണ രീതിയില് പുതിയ ഗുരുതി തയ്യാറാക്കിയാണ് ഗുരുതി വഴിപാട് നടത്തിയതെന്നും ബിജുകുമാര് അറിയിച്ചു.
അന്വേഷണ വിധേയമായി കീഴ്ക്കാവ് ശാന്തിയുടെ രണ്ട് ശിഷ്യരെ ജോലിയില്നിന്നു മാറ്റി നിര്ത്തി. നാല് ദേവസ്വം ജീവനക്കാര്ക്ക് കാരണം കാണിക്കല് നോട്ടീസും നല്കിയിട്ടുണ്ട്. ചീഫ് വിജിലന്സ് ഓഫീസര് ആര്.കെ. ജയരാജ് തിങ്കളാഴ്ച രാവിലെ ചോറ്റാനിക്കര ദേവീക്ഷേത്രത്തിലെത്തി ജീവനക്കാരുടെയും മറ്റും മൊഴിയെടുത്തു. വിവരമറിഞ്ഞ് സ്വയം അന്വേഷണം തുടങ്ങിയതാണെന്നും വിഷയം വളരെ ഗൗരവമുള്ളതാണെന്നും ചീഫ് വിജിലന്സ് ഓഫീസര് പറഞ്ഞു.
