ലക്നൗ: ഇന്ത്യന് മണ്ണില് കരീബിയന് പടയുടെ ദുരിതം അവസാനിക്കുമെന്ന് തോന്നുന്നില്ല. ടെസ്റ്റും ഏകദിനവും പിടിച്ചടക്കിയതുപോലെ ട്വന്റി 20 യും കൈപ്പിടിയിലൊതുക്കാന് രോഹിതിന്റെ ഇന്ത്യന് പട്ടാളം ഇറങ്ങുകയാണ്. നിര്ണായമായ രണ്ടാം ട്വന്റി 20 മത്സരത്തില് ഇന്ത്യയും വിന്ഡീസും ഇന്ന് ഏറ്റുമുട്ടും. ജയിച്ചാല് ഇന്ത്യക്ക് മൂന്ന് മത്സരങ്ങളുടെ ട്വന്റി 20 പരമ്പരയും സ്വന്തമാകും.
കൊല്ക്കത്തയിലെ ആദ്യ മത്സരത്തില് വിന്ഡീസിനെ അഞ്ചു വിക്കറ്റിന് തോല്പ്പിച്ച ഇന്ത്യ പരമ്പരയില് 1-0 ന് മുന്നിട്ടുനില്ക്കുകയാണ്. ട്വന്റി 20 യില് ലോക ചാമ്പ്യന്മാരായ വിന്ഡീസിനെതിരെ തുടര്ച്ചയായ നാലു തോല്വികള്ക്കുശേഷമാണ് ഇന്ത്യ ഇന്ത്യ ഈഡന് ഗാര്ഡനില് വിജയം പിടിക്കുന്നത്. 2014 മാര്ച്ചില് ബംഗ്ലാദേശില് നടന്ന ട്വന്റി 20 ലോക കപ്പിലാണ് അവസാനമായി ഇന്ത്യ വിന്ഡീസിനെ തോല്പ്പിച്ചത്.
ആദ്യ മത്സരത്തില് ഇന്ത്യ ആയാസപ്പെട്ടാണ് അഞ്ചു വിക്കറ്റിന്റെ വിജയം പിടിച്ചത്്. മുന് നായകന് ധോണിയെ കൂടാതെ ഇതാദ്യമായാണ് ഇന്ത്യ ട്വന്റി 20 മത്സരത്തിനിറങ്ങിയത്.
കോഹ് ലിയുടെ അഭാവത്തില് ടീമിനെ നയിച്ച രോഹിത് ശര്മയ്ക്ക് കൊല്ക്കത്തയില് തിളങ്ങാനായില്ല. ഓപ്പണര് ശിഖര് ധവാന്, കെ.എല്.രാഹുല്, യുവതാരം ഋഷഭ് പന്ത്, മനീഷ പാണ്ഡ്യ തുടങ്ങിയവര്ക്കും ആദ്യ മത്സരത്തില് അവസരത്തിനൊത്തുയരാനായില്ല.
