കോഴിക്കോട്: ശക്തമായ കാറ്റിലും മഴയിലും പെട്ട് എണ്ണൂറോളം പേരടങ്ങുന്ന കൈലാസയാത്രാസംഘങ്ങള് നേപ്പാളിലെ സിമികോട്ടില് കുടുങ്ങി. സംഘത്തില് നാല് മലയാളികളും ഉള്പ്പെടുന്നു. കോഴിക്കോട് കക്കോടി പാലത്ത് സ്വദേശികളായ ചന്ദ്രന്, വനജ, എറണാകുളം സ്വദേശി ലക്ഷ്മി, പെരിന്തല്മണ്ണ സ്വദേശി രമാദേവി എന്നിവരാണ് മലമുകളില് അകപ്പെട്ട മലയാളികള്. ഇവര് സുരക്ഷിതരാണെന്നാണ് ലഭിക്കുന്ന വിവരം.
ജൂണ് 21 ന് ആണ് കോഴിക്കോട് സദ്ഗമയ ടൂര് ആന്ഡ് ട്രാവല് ഏജന്സിയുടെ കീഴില് 32 പേരടങ്ങുന്ന സംഘം കേരളത്തില് നിന്ന് പുറപ്പെട്ടത്. നേപ്പാള് ജംഗിലെ ബേസ് ക്യാമ്പില് നിന്ന് 27 ന് വിമാനത്തില് നേപ്പാളിലെ സിമി കോട്ടിലെത്തി. അവിടെനിന്നും ഹില്സ എന്ന സ്ഥലത്തേക്ക് ഹെലികോപ്ടറില് പോകേണ്ടിയിരുന്നു. എന്നാല് കാറ്റും മഴയും ശക്തമായതോടെ ഹെലികോപ്ടര് എത്തിയില്ല. മഴയും കാറ്റും മൂലം ബേസ് ക്യാമ്പില് നിന്ന് വിമാനത്തിനും എത്താനായില്ല. 29 ന് കാലാവസ്ഥയില് അല്പം മാറ്റം വന്നതോടെ മലയാളി സംഘത്തിലെ 32 പേരെ ക്യാമ്പില് എത്തിച്ചു. എന്നാല് വീണ്ടും മഴ ശക്തമായതിനാല് വിമാന സര്വീസ് നിര്ത്തി വച്ചതോടെ നാല് പേര് അവിടെ കുടുങ്ങുകയായിരുന്നു.
ഹില്സയില് നിന്ന് ഇന്നലെ എഴുനൂറോളംപേരെ കൂടി സിമി കോട്ടിലെത്തിച്ചിട്ടുണ്ട്. ഹില്സയിലും നിരവധി പേര് കുടുങ്ങിയിട്ടുണ്ടെന്നാണ് സൂചന. കേന്ദ്ര പ്രതിരോധ മന്ത്രാലയവും നേപ്പാളിലെ ഇന്ത്യന് എംബസിയും സ്ഥിതിഗതികള് വിലയിരുത്തുന്നതായി ടൂര് ഓപ്പറേറ്റര് വിനോദ് ഇടമന പറഞ്ഞു. ഇദ്ദേഹം അടക്കമുള്ള മലയാളികള് ഇപ്പോള് നേപ്പാള് ജംഗിലെ ബേസ് ക്യാമ്പിലുണ്ട്.
