ഗുവഹാത്തി: ഐഎസ്എല്ലില് ഇന്ന് പൂനെ സിറ്റി എവേ മത്സരത്തില് നോര്ത്ത് ഈസ്റ്റ് യുണൈറ്റഡുമായി ഏറ്റുമുട്ടും.
കഴിഞ്ഞ ദിവസം കേരള ബ്ലാസ്റ്റേഴ്സിനോട് സ്വന്തം മണ്ണില് തോല്ക്കേണ്ടിവന്ന ക്ഷീണത്തില് നിന്ന് കരകയറാനാണ് പൂനെ ഇന്ന് എവേ മത്സരത്തിനിറങ്ങുന്നത്. ഇന്ന് നോര്ത്ത് ഈസ്റ്റിനെ പരാജയപ്പെടുത്താന് കഴിഞ്ഞാല് അവര്ക്ക് സെമി സാധ്യത നിലനിര്ത്താം. അതേസമയം നോര്ത്ത് ഈസ്റ്റിനും ഇന്ന് വിജയം അനിവാര്യം.
നിലവില് 13 കളികളില് നിന്ന് 22 പോയിന്റുമായി മൂന്നാമതാണ് പൂനെ സിറ്റി. നോര്ത്ത് ഈസ്റ്റ് 12 കളികളില് നിന്ന് 7 തോല്വിയും മൂന്ന് വിജയവും രണ്ട് സമനിലയുമടക്കം 11 പോയിന്റുമായി ഒമ്പതാമതും.
പൂനെയില് നടന്ന ആദ്യ പാദ മത്സരത്തില് പൂനെ സിറ്റി എഫ്സി നോര്ത്ത് ഈസ്റ്റിനെതിരെ തകര്പ്പന് വിജയം നേടിയിരുന്നു. മറുപടിയില്ലാത്ത അഞ്ച് ഗോളുകള്ക്കായിരുന്നു അന്ന് പൂനെയുടെ ജയം. ഈ സീസണില് ഒരു ടീം നേടുന്ന എറ്റവും വലിയ ഏകപക്ഷീയ ജയം ആയിരുന്നു അത്.
എന്നാല് ജയങ്ങളോടൊപ്പം തോല്വികളും വാങ്ങിക്കൂട്ടുന്നതില് പൂനെ പിന്നിലല്ല. 13 മത്സരങ്ങള് കളിച്ചതില് എഴ്—മത്സരങ്ങള് ജയിച്ചപ്പോള് അഞ്ച് മത്സരങ്ങള് തോറ്റു. നോര്ത്ത് ഈസ്റ്റ് ആകട്ടെ അവസാന മത്സരത്തില് കരുത്തരായ ഗോവയെ 2-2ന് സമനിലയില് പിടിച്ചതിന്റെ ആവേശത്തിലാണ്.
നോര്ത്ത്—ഈസ്റ്റിന്റെ ഹോം ഗ്രൗണ്ടിലെ കഴിഞ്ഞ അഞ്ച്—മത്സരങ്ങളില് രണ്ടെണ്ണത്തില് തോറ്റപ്പോള് രണ്ടില് ജയിക്കുകയും ചെയ്തു. ഒരെണ്ണം സമനിലയിലും കലാശിച്ചു. ഇന്ന് സ്വന്തം ഗ്രൗണ്ടില് കളിക്കാനിറങ്ങുമ്പോള് വിജയത്തില് കുറഞ്ഞതൊന്നും നോര്ത്ത് ഈസ്റ്റ് ലക്ഷ്യമിടുന്നില്ല. ഇന്നും പരാജയപ്പെട്ടാല് അവരുടെ പ്ലേ ഓഫ് സാധ്യത തന്നെ ഇല്ലാതാകും.
പ്രതികരിക്കാൻ ഇവിടെ എഴുതുക: