ആലപ്പുഴ: കുട്ടികളില് ആരോഗ്യപ്രശ്നങ്ങളും വൈകല്യങ്ങളും കൂടുന്നതായി പഠനം. അങ്കണവാടികള് കേന്ദ്രീകരിച്ചു നടത്തിയ സര്വേയിലാണിക്കാര്യം ബോധ്യപ്പെട്ടത്. ആയുര്വേദ വകുപ്പ് നടത്തിയ പഠനത്തിന്റെ വെളിച്ചത്തില് കൗമാരഭൃത്യം എന്ന പ്രത്യേക ചികിത്സ വിഭാഗം ജില്ല ആയുര്വേദ ആശുപത്രിയില് തുടങ്ങിയിട്ടുണ്ട്.
കഴിഞ്ഞ വര്ഷത്തെ കണക്കു പ്രകാരം ജില്ലയില് 1,618 കുട്ടികള് സെറിബ്രല്പാള്സി, ഓട്ടിസം, മാനസിക വളര്ച്ചക്കുറവ് എന്നീ ജ•വൈകല്യം ബാധിച്ചവരാണ്. ജില്ലയിലെ കുട്ടികളില് 15 ശതമാനത്തിനും ശ്വാസകോശ സംബന്ധമായ അസുഖമുള്ളതായി കണക്കുകള് സൂചിപ്പിക്കുന്നു. ഗ്രാമീണ മേഖലയില് 18 ശതമാനവും നഗരമേഖലയില് പന്ത്രണ്ടു ശതമാനവും കുട്ടികളില് ത്വക്ക് രോഗങ്ങള് കണ്ടെത്തിയിട്ടുണ്ട്.
കുട്ടികളിലെ ജനനവൈകല്യങ്ങള്, പഠനവൈകല്യങ്ങള്, മാനസിക പ്രശ്നങ്ങള്, ശ്വാസകോശ സംബന്ധമായ രോഗങ്ങള്, ത്വക്ക് രോഗങ്ങള്, അലര്ജി തുടങ്ങിയവയിലുള്ള വര്ധന ആശങ്കജനകമാണെന്നാണ് ഭാരതീയ ചികിത്സ വകുപ്പിന്റെ കണ്ടെത്തല്. ഇവ ഇപ്പോഴെ ചികിത്സിച്ചു തുടങ്ങിയില്ലെങ്കില് സാമൂഹികവിപത്തായി മാറുമെന്ന് ശങ്കയും വകുപ്പിനുണ്ട്.
കുട്ടികളിലെ രോഗങ്ങളും വൈകല്യങ്ങളും കണ്ടെത്തി ഫലപ്രദമായ ചികിത്സാ നല്കുന്നതിനാലാണ് കൗമരഭൃത്യം പദ്ധതിക്ക് വകുപ്പ് തുടക്കം കുറിച്ചിട്ടുള്ളത്. രോഗപ്രതിരോധശേഷി വര്ധിപ്പിക്കുക, കുട്ടികളുടെ വ്യക്തിത്വ വികസനം, കൗണ്സിലിങ്, ബോധവത്കരണം എന്നിവയുള്പ്പെട്ട കര്മ്മപദ്ധതിയാണ് കൗമാരഭൃത്യം. ഒന്നു മുതല് പതിനാറു വയസു വരെയുള്ള കുട്ടികളിലെ പ്രശ്നങ്ങള് മനസ്സിലാക്കിയാണ് ചികിത്സാവിധി നിര്ണ്ണയിക്കുക. ഇതിനായി അങ്കണവാടി സ്കൂള് തലങ്ങളില് പ്രത്യേക പരിപാടികളും സംഘടിപ്പിക്കുമെന്ന് പദ്ധതിക്ക് നേതൃത്വം നല്കുന്ന ചീഫ് മെഡിക്കല് ഓഫീസര് ഡോ. ജയന് പറഞ്ഞു.
