കൊച്ചി: ജില്ലയുടെ കിഴക്കന്‍ പ്രദേശങ്ങളില്‍ മഞ്ഞപിത്തം (ഹെപ്പറ്റൈറ്റിസ്-എ) കണ്ടെത്തിയതിനാല്‍ ആരോഗ്യവകുപ്പ് ജാഗ്രതാ നിര്‍ദ്ദേശം നല്‍കി. മലിനമായ കുടിവെള്ളത്തിലൂടെയും, ഭക്ഷണത്തിലൂടെയും പകരുന്ന ഹെപ്പറ്റൈറ്റിസ് എ വിഭാഗത്തില്‍പ്പെട്ട മഞ്ഞപ്പിത്തമാണ് കണ്ടെത്തിയത്. അതിനാല്‍, മുന്‍കരുതലുകള്‍ എടുക്കണമെന്ന് ജില്ലാ മെഡിക്കല്‍ ഓഫീസര്‍ അറിയിച്ചു.
*നന്നായി തിളപ്പിച്ച വെള്ളം മാത്രമേ കുടിക്കാവൂ. ഹോട്ടലുകള്‍, ബേക്കറികള്‍, കൂള്‍ബാറുകള്‍, തട്ടുകടകള്‍, ക്യാന്റീനുകള്‍, കാറ്ററിംഗ് യൂണിറ്റുകള്‍ എന്നിവിടങ്ങളില്‍ കുടിവെള്ളവും, ആഹാരസാധനങ്ങളും ശുചിയായി കൈകാര്യം ചെയ്യണം.
*ഹോട്ടലുകളില്‍ തിളപ്പിച്ച വെള്ളം മാത്രമേ കുടിക്കാന്‍ കൊടുക്കാവൂ. യാതൊരു കാരണവശാലും തിളപ്പിച്ചവെള്ളവും, പച്ചവെള്ളവും കൂട്ടികലര്‍ത്തരുത്.
*ഭക്ഷണസാധനങ്ങള്‍ ഈച്ച കയറാത്തവിധം അടച്ചുസൂക്ഷിക്കണം. പഴകിയ ഭക്ഷണം കഴിക്കരുത്. ആഹാരസാധനങ്ങള്‍ കൈകാര്യംചെയ്യുന്നതിനുമുമ്പ് സോപ്പ് ഉപയോഗിച്ച് കൈകള്‍ വൃത്തിയായി കൈകഴുകണം. കക്കൂസില്‍ പോയതിനുശേഷം കൈകള്‍ സോപ്പ് ഉപയോഗിച്ച് കഴുകണം.
*ശീതളപാനീയങ്ങള്‍ ഉണ്ടാക്കുവാനുപയോഗിക്കുന്ന ഐസിലും വെള്ളത്തിലും രോഗാണുക്കളുണ്ടാകുവാനുള്ള സാധ്യതയേറയാണ്. അതിനാല്‍, ഐസ് ഒഴിവാക്കണം. •
*പഴങ്ങളും പച്ചക്കറികളും ശുദ്ധജലത്തില്‍ നന്നായി കഴുകിയ ശേഷം മാത്രം ഉപയോഗിക്കുക. കിണറുകള്‍ ഉപയോഗിക്കുന്നവര്‍ ആരോഗ്യപ്രവര്‍ത്തകരുടെ നിര്‍ദേശാനുസരണം ക്ലോറിനേഷന്‍ നടത്തണം.
* ജോലിക്ക് പോകുമ്പോഴും, യാത്രകളിലും, തിളപ്പിച്ചാറിയ വെള്ളം കൂടെ കരുതണം. പനി, ശരീരവേദന, ഓക്കാനം, ഛര്‍ദി, ക്ഷീണം, തുടങ്ങിയ രോഗലക്ഷണങ്ങള്‍ അനുഭവപ്പെട്ടാല്‍ തൊട്ടടുത്തുള്ള ആരോഗ്യ കേന്ദ്രത്തില്‍ ചികിത്സ തേടണം.
പ്രതികരിക്കാൻ ഇവിടെ എഴുതുക: