മാനന്തവാടി: കേന്ദ്ര വനം പരിസ്ഥിതി മന്ത്രാലയത്തിന്റെ അനുമതി കൂടാതെ കുറുവാ വനത്തില്‍ ഇക്കോ ടൂറിസത്തിന്റെ പേരില്‍ നടപ്പിലാക്കുന്ന വിനോദസഞ്ചാര പദ്ധതി നിര്‍ത്തലാക്കാന്‍ ഉത്തരവുണ്ടാകണമെന്നാവശ്യപ്പെട്ടുകൊണ്ട് ഹൈക്കോടതിയില്‍ ഹര്‍ജി. പയ്യമ്പള്ളി സ്വദേശികളും കര്‍ഷകരുമായ കെ എം ശശിധരന്‍, കുടിലിങ്കല്‍ ബേബിസ്‌ക്കറിയ എന്നിവരാണ് തങ്ങളുടെ കൃഷിയിടങ്ങള്‍ക്കും ജീവനും സംരക്ഷണമുറപ്പിക്കുന്നതിനായി കുറുവയിലെ ടൂറിസം നിര്‍ത്താനുത്തരവുണ്ടാകണമെന്നാവശ്യപ്പെട്ടുകൊണ്ട് ഈ മാസം നാലിന് അഡ്വ ഹരീഷ് വാസുദേവ് മുഖേന റിട്ട്‌പെറ്റീഷന്‍(സിവില്‍) സമര്‍പ്പിച്ചത്.
പാല്‍വെളിച്ചംവഴി ഡിടി പിസി പ്രവേശനം നല്‍കുന്ന വിനോദസഞ്ചാര നടപടിക്കെതിരെയാണ് ഹര്‍ജിയില്‍ പ്രധാനമായും ഉന്നയിച്ചിരിക്കുന്നത്. കുറുവയില്‍ നടത്തിവരുന്ന അനിയന്ത്രിതമായ വിനോദസഞ്ചാരം 950 ഏക്കറോളം വരുന്ന ജൈവവൈവിദ്ധ്യമാര്‍ന്ന വനമേഖലയുടെ നാശത്തിനിടയാക്കുന്നെന്നും കാര്യമായ പഠനങ്ങളൊന്നും നടത്താതെയാണ് അനിയന്ത്രിതമായി സഞ്ചാരികളെ വനത്തിനുള്ളിലേക്ക് പ്രവേശിപ്പിക്കുന്നതെന്നും ഹര്‍ജിയില്‍ പറയുന്നു.
വനംവകുപ്പ് സ്ഥലം വിനോദസഞ്ചാരത്തിനായി ഉപയോഗിക്കുമ്പോള്‍ പാലിക്കേണ്ട നിയമങ്ങള്‍ക്ക് വിരുദ്ധമായാണ് ഇവിടെ നടന്ന പ്രവൃത്തികള്‍. സഞ്ചാരികളുടെ സുരക്ഷക്കായി ബാരിക്കേഡുകള്‍ നിര്‍മിച്ചതോടെ മുത്തങ്ങ, ബന്ദിപ്പൂര്‍, ബ്രഹ്മഗിരി, നാഗര്‍ഹോള, കൊട്ടിയൂര്‍ വനമേഖലയിലൂടെയുള്ള കാട്ടാനകളുടെ പരമ്പരാഗത ആനത്താരക്ക് തടസ്സമാവുകയും ഇത് കാരണം പ്രദേശത്തെ കൃഷിക്കും മനുഷ്യജീവനും കാട്ടാനകള്‍ ഭീഷണിയായി മാറിയതായും ഹര്‍ജിക്കാര്‍ ആരോപിക്കുന്നു. 24 മനുഷ്യജീവന്‍ കാട്ടാന ആക്രമണത്തിലൂടെ പൊലിഞ്ഞതായും 40ലക്ഷത്തോളം രൂപ സര്‍ക്കാര്‍ നഷ്ടപരിഹാരമായി നല്‍കേണ്ടിവന്നുവെന്നും ഹര്‍ജിയിലുണ്ട്. വനമേഖലക്ക് താങ്ങാന്‍ കഴിയുന്ന വിനോദസഞ്ചാരികളുടെ എണ്ണത്തെക്കുറിച്ച് ശാസ്ത്രീയ പഠനങ്ങള്‍ നടത്തി അത് പ്രയോഗവല്‍ക്കരിക്കണം. അതുവരെയും ടൂറിസം നിര്‍ത്തിവെക്കണമെന്നാണ് ആവശ്യം. ഏറെ വിവാദങ്ങള്‍ക്കൊടുവില്‍ ഈ മാസം 16നാണ് കുറുവ കര്‍ശനനിയന്ത്രണങ്ങളോടെ തുറന്നത്. കേസ് പരിഗണിക്കുന്നത് മറ്റൊരുദിവസത്തേക്ക് മാറ്റി.
പ്രതികരിക്കാൻ ഇവിടെ എഴുതുക: