പഴയങ്ങാടി: കണ്ണപുരം തൃക്കോത്ത് ശ്രീകൃഷ്ണക്ഷേത്രത്തില് നിന്ന് നഷ്ടപ്പെട്ടുവെന്ന് പറയപ്പെടുന്ന നാഗമാണിക്യത്തില് ദുരൂഹത തുടരുന്നു. ക്ഷേത്രത്തില് നിന്ന് നഷ്ടപ്പെട്ടുവെന്ന് പറയപ്പെടുന്ന നാഗമാണിക്യം ചക്കരക്കല്ലിലെ വ്യവസായിയില് നിന്ന് കണ്ടെടുത്തുവെന്നാണ് പോലീസ് വിശദീകരണം. നഷ്ടപ്പെട്ട നാഗമാണിക്യം മൂല്ല്യനിര്ണ്ണയത്തിനയക്കുമെന്ന് പോലീസ് വ്യക്തമാക്കിയിരുന്നു. എന്നാല് ക്ഷേത്രത്തില് ഇത്തരത്തില് നാഗമാണിക്യം ലഭിക്കുകയോ നഷ്ടപ്പെടുകയോ ചെയ്തിട്ടില്ലെന്നാണ് ക്ഷേത്രരേഖകള് വ്യക്തമാക്കുന്നത്. 2008 ആഗസ്റ്റ് 21 നാണ് പോള മീനാക്ഷി സ്വര്ണ്ണം കെട്ടിയ രക്തചന്ദനമാല തൃക്കോത്ത് അമ്പല നടയില് സമര്പ്പിച്ചത്. ഇത് ക്ഷേത്രം രജിസ്റ്ററില് വ്യക്തമായി രേഖപ്പെടുത്തിയിട്ടുണ്ട്. പ്രസ്തുത ആഭരണം ദേവസ്വത്തിന്റെയും ക്ഷേത്രമേല്ശാന്തിയുടെയും സംരക്ഷണത്തില് ക്ഷേത്രപ്രതിഷ്ഠയില് ചാര്ത്തുന്നതാണ്.
എട്ട് വര്ഷത്തിന് ശേഷം ക്ഷേത്രത്തില് സമര്പ്പിച്ച സാധനങ്ങള്ക്ക് വേണ്ടി മീനാക്ഷിയുടെ സഹോദരന് പോള ജയരാജനെത്തിയതോടെയാണ് കേസിനാസ്പദമായ സംഭവമുണ്ടായത്. എന്നാല് പോള ജയരാജന് എന്തെങ്കിലും വസ്തുക്കള് ക്ഷേത്രത്തിന് സമര്പ്പിച്ചതായി രേഖകളില്ല. ചില പോലീസ് ഉദ്യോഗസ്ഥര് കേസിലെടുത്ത അമിത താല്പര്യവും നടപടക്രമങ്ങളും ദുരൂഹതയുയര്ത്തുന്നതാണ്. ക്ഷേത്രത്തില് നിന്ന് നഷ്ടപ്പെട്ടുവെന്ന് പറയുന്ന നാഗമാണിക്യം വ്യവസായിയില് നിന്ന് കണ്ടെത്തിയപ്പോള് ആരോപണവിധേയനായ ജ്യോത്സ്യരെ പോലീസ് സംഭവസ്ഥലത്തെത്തിക്കുകയോ മോഷണവസ്തു വിലയ്ക്ക് വാങ്ങിയ ലക്ഷ്മണനെ പ്രതിയയാക്കുകയോ ചെയ്തിട്ടില്ല എന്നതും സംശയാസ്പദമാണ്.
ജ്യോത്സ്യരായ സുഭാഷ് ചെറുകുന്നിനെ കരിവാരിത്തേക്കാന് ബോധപൂര്വ്വം കെട്ടിച്ചമച്ചതാണ് നാഗമാണിക്യവുമായി ബന്ധപ്പെട്ട സംഭവങ്ങളെന്നും ആരോപണമുണ്ട്. കേസ് കെട്ടിച്ചമച്ചതാണെന്നാരോപിച്ച് സുബാഷ് ജ്യോത്സ്യര് പോലീസ് കംപ്ലയിന്റ് അതോറിറ്റിക്കും മനുഷ്യാവകാശ കമ്മീഷനും പരാതി നല്കിയിട്ടുണ്ട്. 2008 ല് ക്ഷേത്രത്തിന് സംഭാവന ചെയ്ത ഒരു മാലയെക്കുറിച്ച് കളവായി കേസ് രജിസ്റ്റര് ചെയ്തെന്നും, തന്റെ കസ്റ്റഡിയിലോ കൈവശമോ ഇല്ലാത്ത മാലയെക്കുറിച്ച് കളവായി കേസ് രജിസ്റ്റര് ചെയ്ത് കുപ്രചരണം നടത്തി തന്നെ അപമാനിതനാക്കിയെന്നും പരാതിയില് പറയുന്നു.
കൊല്ലൂര് മൂകാംബിക ക്ഷേത്രത്തില് നടത്തുന്ന സ്വര്ണപ്രശ്നത്തില് ചോദ്യകര്ത്താവായി നിശ്ചയിച്ച തന്നെക്കുറിച്ച് ക്ഷേത്രം തന്ത്രിയായ ബ്രഹ്മശ്രീ മഞ്ജുനാഥ അഡിഗക്ക് വാട്സ് ആപ്പില് പത്രവാര്ത്ത അയച്ചുകൊടുത്ത് കള്ളനായി ചിത്രീകരിച്ചുവെന്നും പരാതിയില് വ്യക്തമാക്കിയിട്ടുണ്ട്.
