പറവൂര്‍: ബിജെപി വടക്കേക്കര പഞ്ചായത്ത് കമ്മിറ്റി പ്രസിഡന്റ് ടി.ജെ. ജിജേഷിനേയും കുടുംബത്തേയും പാലക്കാട് വിമലാദേവിയേയും കുടുംബത്തേയും ചുട്ടുകരിച്ചതുപോലെ വകവരുത്താനാണ് സിപിഎമ്മുകാര്‍ ശ്രമിച്ചതെന്ന് ബിജെപി സംസ്ഥാന ജനറല്‍ സെക്രട്ടറി എ.എന്‍. രാധാകൃഷ്ണന്‍ പറഞ്ഞു. സിപിഎമ്മുകാര്‍ തീവെച്ചുനശിപ്പിച്ച ജിജേഷിന്റെ വീട് സന്ദര്‍ശിച്ചശേഷം സംസാരിക്കുകയായിരുന്നു അദ്ദേഹം.
സംഭവം നടന്ന് മൂന്ന് ദിവസം കഴിഞ്ഞിട്ടും പ്രതികളെ പിടികൂടാനോ അന്വേഷണം നടത്താനോ വടക്കേക്കര പോലീസ് തയ്യാറായിട്ടില്ല. എസ്‌ഐ സിപിഎമ്മുകാരനെപ്പോലെയാണ് അക്രമത്തിനിരയായവരോട് പെരുമാറുന്നത്. കുറ്റക്കാരെ പിടികൂടുന്നതുവരെ ബിജെപി ശക്തമായ സമരപരിപാടികള്‍ തുടരുമെന്നും അദ്ദേഹം പറഞ്ഞു. വെള്ളിയാഴ്ച പുലര്‍ച്ചെ മൂന്നുമണിയോടെയാണ് ബൈക്കില്‍ എത്തിയ അക്രമിസംഘം ജിജേഷിന്റെ വീടിന്റെ വാതില്‍ തകര്‍ത്ത് അകത്ത് കടക്കാന്‍ ശ്രമിച്ചത്. തുടര്‍ന്ന് കാര്‍പോര്‍ച്ചിലുണ്ടായിരുന്ന മൂന്ന് ബൈക്കുകള്‍ പെട്രോള്‍ ഒഴിച്ച് ചുട്ടുകരിച്ചു. ബിജെപി ജില്ലാ സെക്രട്ടറി എം.എന്‍.ഗോപി, മണ്ഡലം പ്രസിഡന്റ് എസ്. ജയകൃഷ്ണന്‍, ജനറല്‍ സെക്രട്ടറി ടി.ജി. വിജയന്‍ എന്നിവര്‍ ഒപ്പമുണ്ടായിരുന്നു.
പ്രതികരിക്കാൻ ഇവിടെ എഴുതുക: