ബ്ലേഡ്കാരന്‍ തട്ടിയെടുത്ത ഭൂമി തിരിച്ച് പിടിക്കുമെന്ന് പറളിക്കുന്ന് കര്‍മ്മസമിതി

കല്‍പ്പറ്റ: ബ്ലേഡ് ഇടപാടുകാരന്‍ നിര്‍ധന കുടുംബത്തില്‍ നിന്ന് തട്ടിയെടുത്ത 1.89 ഏക്കര്‍ ഭൂമി തിരിച്ചുപിടിക്കുമെന്ന് കണിയാമ്പറ്റ പറളിക്കുന്നിലെ കര്‍മ്മസമിതി ഭാരവാഹികള്‍ കല്‍പറ്റയില്‍ പത്ര സമ്മേളനത്തില്‍ അറിയിച്ചു. പറളിക്കുന്ന് സ്വദേശിയായ പാമ്പറമ്പില്‍ മുനീറിന്റെയും ഭാര്യയുടെയും പേരിലുള്ള 1.89 ഏക്കര്‍ ഭൂമിയാണ് കല്‍പ്പറ്റ നഗരത്തിലെ ബ്ലേഡ് ഇടപാടുകാരനായ അലവിക്കുട്ടിയെന്നായാളും ഭാര്യയും ചേര്‍ന്ന് സ്വന്തമാക്കിയത്. ഗള്‍ഫില്‍ ഹോട്ടല്‍ നടത്തിവന്ന മുനീര്‍ സാമ്പത്തിക ബാധ്യതയെ തുടര്‍ന്നാണ് അലവിക്കുട്ടിയുടെ കെണിയില്‍ പെട്ടത്. മുട്ടില്‍ വില്ലേജിലെ 25 സെന്റ് സ്ഥലവും കണിയാമ്പറ്റ വില്ലേജിലെ 1.5 ഏക്കര്‍ ഭൂമിയും വെങ്ങപ്പള്ളി വില്ലേജിലെ 14 സെന്റ് സ്ഥലവും ഇന്നോവ കാറുമാണ് അലവിക്കുട്ടി തട്ടിയെടുത്തത്.

മുനീറിന്ഇതിനിടെ കാഴ്ച നഷ്ടപ്പെട്ടു. ഇപ്പോള്‍ കല്‍പ്പറ്റയില്‍ ചികിത്സയിലാണ്. മുനീറിനെയും കുടുംബത്തെയും സഹായിക്കാനായി പറളിക്കുന്നില്‍ എല്ലാ രാഷ്‌ട്രീയ പാര്‍ട്ടിയിലെയും ഭാരവാഹികളും നാട്ടുകാരും ചേര്‍ന്ന് കര്‍മ്മസമിതി രൂപീകരിച്ചിരുന്നു. സര്‍വ്വകക്ഷി ഭാരവാഹികള്‍ കല്‍പ്പറ്റ എ.എസ്.പി.ക്ക് പരാതിയും നല്‍കിയിരുന്നു.

എന്നാല്‍ എ.എസ്.പി. ഓഫീസില്‍ നിന്ന് മുനീറിനെ ഫോണ്‍ ചെയ്ത് വിലപേശല്‍ നടത്തുകയാണന്ന് കര്‍മ്മസമിതി ഭാരവാഹികള്‍ പറഞ്ഞു. മധ്യസ്ഥ ശ്രമത്തിന്റെ ഫലമായി 2017 ജൂണ്‍ 30ന് അലവിക്കുട്ടിയുമായി ഒരു കരാര്‍ ഉണ്ടാക്കിയിരുന്നു. ഇതു പ്രകാരം പിണങ്ങോട്ടെ 14 സെന്റ് ഭൂമി 3 ലക്ഷം രൂപ നല്‍കിയും വാര്യാട്ടെ 25 സെന്റ് ഭൂമിക്ക് 10 ലക്ഷം രൂപയും മുനീര്‍ നല്‍കിയാല്‍ തിരിച്ച് നല്‍കണം.

കണിയാമ്പറ്റ വില്ലേജിലെ ഒന്നര ഏക്കറില്‍ 60 സെന്റ് സ്ഥലം പലിശക്ക് പകരമായി അലവിക്കുട്ടിക്ക് നല്‍കിയ ശേഷമുള്ള 90 സെന്റ് സ്ഥലം തിരികെ മുനീറിന് രജിസ്റ്റര്‍ ചെയ്ത് കൊടുക്കണം. കാരാര്‍ പ്രകാരം 2017 ജൂലായ് 30ന് മുമ്പ് ഭൂമി തിരിച്ച് നല്‍കണമായിരുന്നു. ഇത് ലംഘിക്കപ്പെട്ടതോടെയും പൊലീസ് നീതി നടത്തി കൊടുക്കാത്തതിനാലുമാണ് ഇപ്പോള്‍ പ്രക്ഷോഭത്തിന്റെ ഭാഗമായി ബ്ലേഡ് കാരന്‍ തട്ടിയെടുത്ത് ഭൂമിയിലേക്ക് മാര്‍ച്ച് തടത്തുന്നതും തിരിച്ചുപിടിക്കുന്നതും എന്ന് ഭാരവാഹികള്‍ പറഞ്ഞു. ഈ വരുന്ന 12ന് രാവിലെയാണ് മാര്‍ച്ച്. തുടര്‍ന്ന് മുനീറിനെയും കുടുംബത്തെയും അലവിക്കുട്ടിയുടെ വീടിന് മുമ്പില്‍ കുടിയിരുത്തുമെന്നും ഇവര്‍ പറഞു. കര്‍മ്മസമിതി ഭാരവാഹികളായ പ്രകാശ് കാവും മറ്റം, മായന്‍ സിദ്ദീഖ്,വി.പി.യൂസഫ്, പി.ഇ.ജോര്‍ജ്കുട്ടി, എ.മോഹനന്‍, സന്തോഷം പൂന്തോട്ടം, ഇ.പി.ഫിലിപ്പ് ക്കുട്ടി, പി. ഹനീഫ എന്നിവര്‍ പത്ര സമ്മേളനത്തില്‍ പങ്കെടുത്തു.