മാഡ്രിഡ്: സ്പാനിഷ് ലീഗ് ഫുട്ബോളില് ബാഴ്സലോണക്ക് സമനില. സൂപ്പര്താരം ലയണല് മെസ്സിയുടെ ഗോള് അനുവദിക്കാതിരുന്ന മത്സരത്തില് വലന്സിയയാണ് ഒന്നാമതുള്ള ബാഴ്സയെ 1-1ന് സമനിലയില് തളച്ചത്.
കളിയുടെ 29-ാം മിനിറ്റിലായിരുന്നു മെസ്സി വലന്സിയ വലയില് പന്തെത്തിച്ചത്. വലതുവിംഗില് നിന്ന് ലൂയി സുവരാസ് നല്കിയ പാസ് സ്വീകരിച്ച് ബോക്സിന് പുറത്തുനിന്ന് മെസ്സി പായിച്ച ഇടംകാലന് ഷോട്ട് വലന്സിയ ഗോളിയുടെ കയ്യില് നിന്ന് വഴുതിവീണ് കാലുകള്ക്കിടയിലൂടെ വലയില് കയറി. എന്നാല് പോസ്റ്റിനുള്ളില് പതിച്ചശേഷം ഉയര്ന്ന പന്ത് വലന്സിയ ഗോളി വാരി പുറത്തേക്കിടുകയായിരുന്നു. ഗോളെന്ന് ഉറപ്പിച്ച മെസ്സിയും കൂട്ടരും ആഹ്ലാദപ്രകടനം തുടങ്ങിയെങ്കിലും റഫറിയുടെ കണ്ണില് പന്ത് ഗോള്വര കടന്നത് പെട്ടില്ല.
ടിവി റിപ്ലേകളില് ഇത് ഗോളാണെന്ന് വ്യക്തമായിരുന്നു. ഗോള് അനുവദിക്കാത്തതില് ബാഴ്സ താരങ്ങള് റഫറിയെ ചോദ്യം ചെയ്തെങ്കിലും കാര്യമുണ്ടായില്ല. പിന്നീട് കളിയുടെ 60-ാം മിനിറ്റില് റോഡ്രിഗോയിലൂടെ വലന്സിയ മുന്നിലെത്തി. എന്നാല് ശക്തമായി മുന്നേറ്റങ്ങള് നടത്തിയ ബാഴ്സ 82-ാം മിനിറ്റില് ജോര്ഡി ആല്ബയിലൂടെ സമനില പിടിച്ചുപറ്റി.
കളിയുടെ തുടക്കം മുതല് ബാഴ്സയുടെ മുന്നേറ്റങ്ങളായിരുന്നു. പന്തടക്കത്തിലും ഷോട്ടുകള് പായിക്കുന്നതിലും ഏറെ മുന്നിട്ടുനിന്ന അവര്ക്ക് മുന്നില് വിലങ്ങുതടിയായി നിന്നത് വലന്സിയ ഗോളിയുടെ മിന്നുന്ന പ്രകടനമാണ്. സമനിലയില് കുടുങ്ങിയെങ്കിലും 13 കളികളില് നിന്ന് 35പോയിന്റുമായി ബാഴ്സ തന്നെ പട്ടികയില് ഒന്നാമത്. 31 പോയിന്റുമായി വലന്സിയ രണ്ടാം സ്ഥാനത്തും 27 പോയിന്റുമായി അത്. മാഡ്രിഡ്, റയല് മാഡ്രിഡ് എന്നീ ടീമുകള് മൂന്നാമതും.
മറ്റൊരു മത്സരത്തില് സെവിയ രണ്ടിനെതിരെ മൂന്ന് ഗോളുകള്ക്ക് വിയ്യാറയലിനെ തോല്പ്പിച്ചു. 25 പോയിന്റുമായി സെവിയ അഞ്ചാമത്.
