ഗുണ്ടൂര്: നാഗാലാന്ഡിനെ രണ്ട് റണ്സിന് പുറത്താക്കി കേരളത്തിന്റെ അണ്ടര് -19 വനിതാ ക്രിക്കറ്റ് ടീം പുത്തന് ചരിത്രമെഴുതി. ഇവിടെ നടക്കുന്ന ബിസിസിഐ ഏകദിന ലീഗ് ആന്ഡ് നോക്കൗട്ട് ടൂര്ണമെന്റിലാണ് കേരളത്തിന്റെ ഈ മാന്ത്രിക പ്രകടനം. ഫസ്റ്റ്ക്ലാസ് ക്രിക്കറ്റിന്റെ ചരിത്രത്തില് ഇതാദ്യമായാണ് ഒരു ടീം രണ്ട് റണ്സിന് ഓള് ഔട്ടാകുന്നത്്.
അമ്പത് ഓവര് മത്സരത്തിന്റെ പതിനേഴാം ഓവറിലാണ് നാഗാലാന്ഡ് കേവലം രണ്ട് റണ്സിന് വീണത്. ഇതില് ഒരുറണ്സ് മാത്രമാണ് ബാറ്റില് നിന്ന് പിറന്നത്. പതിനെട്ട് പന്ത് നേരിട്ട ഓപ്പണര് മെങ്കയാണ് ഒരു റണ്സ് നേടിയത്. മറ്റൊരു റണ്സ് വൈഡില് നിന്നാണ് ലഭിച്ചത്. ഒമ്പതു പേര് പൂജ്യത്തിന് പുറത്തായി. കേരളത്തിന്റെ ക്യാപ്റ്റന് മിന്നു മണി നാല് ഓവറില് ഒരുറണ്സ്പോലും വിട്ടുകൊടുക്കാതെ നാല് വിക്കറ്റുകള് സ്വന്തമാക്കി.
മറുപടി പറഞ്ഞ കേരള ഒരു പന്തില് വിജയം പിടിച്ചെടുത്തു.നാഗലാന്ഡ് ഓപ്പണിങ്ങ് ബൗളര് ദീപികയുടെ ആദ്യ പന്ത് വൈഡായി. വൈഡിന് പകരമെറിഞ്ഞ പന്ത് അന്സു എസ് രാജു ബൗണ്ടറി കടത്തി കേരളത്തിന് പത്ത് വിക്കറ്റ് വിജയം സമ്മാനിച്ചു.49.5 ഓവര് ശേഷിക്കെയാണ് കേരളം വിജയം നേടിയത്.
ഫസ്റ്റ് ക്ലാസ് ക്രിക്കറ്റിലെ ഏറ്റവും കുറഞ്ഞ സ്കോറാണ് നാഗലാന്ഡ് നേടിയ രണ്ട് റണ്സ്. 1810 ല് ഇംഗ്ലണ്ടിലെ ഓള്ഡ് ലോഡ്സില് ദ ബീസ് ഓള് ഇംഗ്ലണ്ട് ടീമിനെതിരെ നേടിയ ആറു റണ്സിന്റെ റെക്കോഡാണ് നാഗലാന്ഡ് തകര്ത്തത്.
നേരത്തെ എന്ഇ ബിഹാര് അണ്ടര്- 19 ഏകദിന മത്സരത്തില് മണിപ്പൂരിനെതിരെ നാഗലാന്ഡ് 42 വൈഡ് എറിഞ്ഞു. മണിപ്പൂരും മോശമായില്ല. അവര് 94 വൈഡുകളാണ് എറിഞ്ഞത്. മത്സരത്തില് നാഗലാന്ഡ് വിജയവും സ്വന്തമാക്കി.
