കണ്ണൂര്: യൂത്ത് ഫ്രണ്ട് (എം)നേതാവ് സിബി വാഴക്കാല സംസ്ഥാന ജനറല്സെക്രട്ടറി സ്ഥാനം രാജിവെച്ചു. കഴിഞ്ഞ ഏഴ് വര്ഷമായി യൂത്ത് ഫ്രണ്ടിന്റെ സംസ്ഥാന ഭാരവാഹിയായി പ്രവര്ത്തിച്ച് വരികകയാണെങ്കിലും ഉദ്ദേശശുദ്ധിയില്ലാത്ത നേതൃത്വത്തൊപ്പം പ്രവര്ത്തിക്കാന് ഒരു കാരണവശാലും സാധിക്കില്ലെന്നതിനാലാണ് താന് രാജിവെക്കുന്നതെന്ന് സിബി വാഴക്കാല വാര്ത്താസമ്മേളനത്തില് പറഞ്ഞു.
പാര്ട്ടിയില് പി.ടി.ജോസിന്റെ ഏകാധിപത്യമാണ് നടന്നുവരുന്നത്. ഒരു ചര്ച്ച പോലും നടത്താതെ ഇരിട്ടി താലൂക്ക് സഭയില് നിന്നും ഒഴിവാക്കുകയും പാര്ട്ടിവിരുദ്ധ നടപടി സ്വീകരിച്ച റോജസ് സെബാസ്റ്റ്യനെ പോലുള്ള വ്യക്തിയെ ഭാരവാഹിയാക്കിയതിനും പിന്നില് പി.ടി.ജോസാണ് പ്രവര്ത്തിച്ചത്. ആനപ്പന്തി സര്വ്വീസ് സഹകരണ ബാങ്കില് നടക്കുന്ന തെരഞ്ഞെടുപ്പില് പാര്ട്ടി മണ്ഡലം കമ്മിറ്റിയുടെ തീരുമാനം അട്ടിമറിച്ചതും തന്റെ രാജിക്ക് പ്രധാനപ്പെട്ട കാരണമാണ്.
അയ്യന്കുന്ന് പഞ്ചായത്തിലെ ഉരുപ്പുംകുറ്റിയില് ആദിവാസി ഭൂമി തട്ടിയെടുത്ത് കൈവശം വെച്ച് പന്നിഫാം മറ്റും നടത്തുന്ന നടപടി താലൂക്ക് സഭയില് ചോദ്യം ചെയ്തേക്കുമെന്ന് ഭയപ്പെട്ടാണ് തന്നെ താലൂക്ക് സഭയില് നിന്നും ഒഴിവക്കിയതെന്നും സിബി വാഴക്കാല പറഞ്ഞു. പി.ടി.ജോസഫ് മീനച്ചിലിന്റെയും തോമസ് പ്ലാത്തോട്ടം എന്നവരുടെയും മിച്ചഭൂമി സര്ക്കാര് ഏറ്റെടുത്ത് ആദിവാസികള്ക്ക് വിതരണം ചെയ്തത് റോജസ് കൈവശപ്പെടുത്തി അവിടെ ഒരു പന്നിഫാം നടത്തിവരുന്നുണ്ട്. ഇതിന്റെ മറവില് വാറ്റ് ചാരായം ഉണ്ടാക്കുകയും വെടിയിറച്ചി വില്പന നടത്തുകയും ചെയ്യുന്നുണ്ട്. ഇതില് പി.ടി.ജോസും ജോയിസും പങ്കാളികളാണെന്നും സിബി വാഴക്കാല ആരോപിച്ചു.
