വര്ക്കല: വാഹനാപകടത്തില്പ്പെട്ട വര്ക്കല ശ്രീനാരായണ കോളേജിലെ വിദ്യാര്ഥിക്ക് ആംബുലന്സ് വിട്ടുനല്കാത്തത് മരണത്തിനിടയാക്കിയെന്നാരോപിച്ച് വിദ്യാര്ഥികളുടെ പ്രതിഷേധം. വര്ക്കല മിഷന് ആശുപത്രിക്കെതിരെയാണ് സംയുക്ത വിദ്യാര്ഥി യൂണിയന്റെ നേതൃത്വത്തില് പ്രതിഷേധമാര്ച്ച് നടത്തിയത്. മാര്ച്ചിന് നേരെ പോലീസ് ലാത്തിചാര്ജ് നടത്തി. പത്തോളം വിദ്യാര്ഥികള്ക്കും ഒരു വനിതാപോലീസിനും പരിക്കേറ്റു.
ഇന്നലെ രാവിലെ 11 മണിയോടെയാണ് വര്ക്കല മൈതാനത്ത് നിന്ന് വിദ്യാര്ഥികള് ആശുപത്രിയിലേക്ക് മാര്ച്ച് നടത്തിയത്. അണ്ടര് പാസേജിന് സമീപത്ത് പോലീസ് തടഞ്ഞെങ്കിലും വിദ്യാര്ഥികളും പോലീസും തമ്മില് ഉന്തുംതള്ളുമായി. തുടര്ന്ന് വിദ്യാര്ഥികള്ക്ക് നേരെ പോലീസ് ലാത്തിചാര്ജ് നടത്തുകയായിരുന്നു. പരിക്കേറ്റ വിദ്യാര്ഥികള് വര്ക്കല താലൂക്ക് ആശുപത്രിയില് ചികിത്സയിലാണ്.
ഈ മാസം 7 ന് വാഹനാപകടത്തില് പരിക്കേറ്റ സച്ചിന് എന്ന വിദ്യാര്ഥിയെ രാത്രി 7.50 ഓടെ ആശുപത്രിയില് കൊണ്ടുവന്നു. അവസ്ഥ ഗുരുതരമായതിനെ തുടര്ന്ന് അനന്തപുരി ആശുപത്രിയിലേക്ക് റഫര് ചെയ്തു. എന്നാല് പ്രാഥമിക ചികിത്സ നല്കിയതിനും ആംബുലന്സ് വിട്ടുനല്കുന്നതിനും 4000 രൂപ കെട്ടിവയ്ക്കണമെന്ന് ആശുപത്രി അധികൃതര് ആവശ്യപ്പെട്ടുവത്രേ. ഒപ്പമുണ്ടായിരുന്ന സുഹൃത്തുക്കള് കയ്യിലുണ്ടായിരുന്ന വാച്ചുകളും മൊബൈലുകളും ഗ്യാരണ്ടി നല്കാമെന്നു പറഞ്ഞുവെങ്കിലും ആശുപത്രി അധികൃതര് സമ്മതിച്ചില്ലെന്ന് വിദ്യാര്ഥികള് ആരോപിക്കുന്നു.
എന്നാല് സച്ചിന് എല്ലാ ചികിത്സയും നല്കിയിരുന്നുവെന്ന് മിഷന് ആശുപത്രി അധികൃതര് പറഞ്ഞു. രണ്ടുദിവസം കഴിഞ്ഞ് സച്ചിന് മരിച്ചശേഷം നിരന്തരം ആശുപത്രിയെയും ശിവഗിരി മഠത്തെയും സന്ന്യാസിവര്യന്മാരെയും നവമാധ്യമങ്ങളിലൂടെയും മറ്റും അപകീര്ത്തിപ്പെടുത്തുന്ന തരത്തില് വാര്ത്തകളും ട്രോളുകളും പ്രചരിപ്പിക്കുകയും ഇതിന്റെ പേരില് സാമൂഹ്യവിരുദ്ധര് അക്രമം അഴിച്ചുവിട്ട് ആശുപത്രി ഉപകരണങ്ങള് നശിപ്പിച്ച് പ്രവര്ത്തനം തടസപ്പെടുത്താന് ശ്രമിക്കുകയാണെന്ന് ആശുപത്രി അധികൃതര് പറയുന്നു. സംഭവത്തെ കുറിച്ച് ഉന്നതതല അന്വേഷണം കുറ്റക്കാര്ക്കെതിരെ നടപടി സ്വീകരിക്കണമെന്നും ആശുപത്രി മാനേജ്മെന്റ് ആവശ്യപ്പട്ടു.
ശിവഗിരി മഠത്തിന്റെ കീഴില് പ്രവര്ത്തിക്കുന്ന ആശുപത്രിയില് ഓരോ വര്ഷവും ലക്ഷക്കണക്കിന് രൂപ സേവന-കാരുണ്യ പ്രവര്ത്തനങ്ങള്ക്കായി നീക്കിവയ്ക്കുന്നുണ്ട്. സച്ചിന് ആംബുലന്സ് വിട്ട് കൊടുക്കാതിരിക്കുകയോ പൈസ ഇല്ലാത്തതിന്റെ പേരില് ചികിത്സ നിഷേധിക്കുകയോ ചെയ്തിട്ടില്ല. മറിച്ചുള്ള പ്രചാരണം തികച്ചും അടിസ്ഥാനരഹിതമാണെന്നും ശിവഗിരി മഠത്തെയും സന്ന്യാസിവര്യന്മാരെയും ശിവഗിരി മഠത്തിലെ സ്ഥാപനങ്ങളെയും കരിവാരി തേക്കാനുള്ള ഗൂഢാലോചന നടക്കുന്നതായി സംശയിക്കുന്നതായും ആശുപത്രിയില് നിന്നുള്ള പത്രകുറിപ്പില് അറിയിച്ചു.
