മലപ്പുറം: ഐഎസ് ബന്ധമുള്ള കൂടുതല് പേര് സംസ്ഥാനത്തുണ്ടെന്ന് പോലീസിന്റെ നിഗമനം. മൂന്ന് മലപ്പുറം സ്വദേശികളടക്കം എട്ട് പേര്ക്കെതിരെ കേസ് രജിസ്റ്റര് ചെയ്ത് അന്വേഷണം ആരംഭിച്ചു.
പെരിന്തല്മണ്ണ ഡിവൈഎസ്പി എം.പി. മോഹനചന്ദ്രനാണ് അന്വേഷണച്ചുമതല. മലപ്പുറം ജില്ലയില് നിന്ന് നിരവധി ആളുകള് ഐഎസില് ചേര്ന്നതായി സ്ഥിരീകരിക്കാത്ത റിപ്പോര്ട്ടുകളുണ്ടായിരുന്നു. നാടുവിട്ട് പോയവരെക്കുറിച്ചായിരുന്നു ആരോപണങ്ങള് പലതും. ഇങ്ങനെ കാണാതായവരില് ആരെയും കണ്ടെത്താനാകാത്തത് പോലീസിന്റെ സംശയം ബലപ്പെടുത്തുകയാണ്.
കഴിഞ്ഞ രണ്ടുവര്ഷത്തിടെ നാട്ടില് നിന്ന് അപ്രത്യക്ഷമായവരെ കേന്ദ്രീകരിച്ചാണ് ഇപ്പോള് അന്വേഷണം പുരോഗമിക്കുന്നത്. വണ്ടൂര് സ്റ്റേഷനില് രജിസ്റ്റര് ചെയ്ത കേസില് അകപ്പെട്ട എട്ടുപേരില് ആരെങ്കിലുമായി കാണാതായവര്ക്ക് എന്തെങ്കിലും ബന്ധമുണ്ടോയെന്നാണ് ആദ്യം അന്വേഷിക്കുന്നത്.
ഒക്ടോബര് 25ന് കണ്ണൂര് വളപട്ടണത്ത് പിടിയിലായ യു.കെ.ഹംസ ഐഎസില് നിന്ന് മടങ്ങിയെത്തിയ ആളാണ്. ഇയാള് പലതവണ മലപ്പുറം ജില്ലയില് വന്നുപോയതായി പോലീസിന് വിവരം ലഭിച്ചിട്ടുണ്ട്. ഐഎസില് ചേര്ന്ന മലപ്പുറം വാണിയമ്പലം സ്വദേശി അഷറഫ് മൗലവിയുടെ വീട്ടില് ഹംസ പങ്കെടുത്ത രഹസ്യയോഗങ്ങള് നടന്നിരുന്നു. ഹംസയും അഷറഫ് മൗലവിയും താമരശ്ശേരി സ്വദേശിയായ ഷൈബു നിഹാറും ചേര്ന്നാണ് പദ്ധതികള് ആവിഷ്ക്കരിച്ചത്.
അഷറഫ് മൗലവിയും ഷൈബു നിഹാറും ഇപ്പോള് സിറിയയിലാണെന്നാണ് വിവരം. ഹംസയെ കൂടുതല് ചോദ്യം ചെയ്താല് ഐഎസില് ചേരാന് തയ്യാറായിരിക്കുന്ന നിരവധി പേരെ കണ്ടെത്താനാകുമെന്ന് പോലീസ് പ്രതീക്ഷിക്കുന്നു.
