മലപ്പുറം: ജില്ലയില്‍ ഗെയില്‍ പദ്ധതി പൈപ്പ് ലൈന്‍ പോകുന്ന പ്രദേശത്തെ മുഴുവന്‍ ഭൂവുടമകളേയും ജനപ്രതിനിധികളെയും വസ്തുത ബോദ്ധ്യപ്പെടുത്തിയ ശേഷമേ നടപ്പിലാക്കുവെന്ന് ജില്ലാ കളക്ടര്‍ അമിത് മീണ. പദ്ധതി നടപ്പാക്കുന്ന പ്രദേശത്തെ എംഎല്‍എമാരുടെയും പഞ്ചായത്ത് പ്രസിഡന്റുമാരുടെയും യോഗത്തില്‍ അദ്ധ്യക്ഷത വഹിച്ച് സംസാരിക്കുകയായിരുന്നു കളക്ടര്‍.
പദ്ധതി പ്രദേശത്തെ ആളുകളെ നേരിട്ട് കാര്യങ്ങള്‍ ബോദ്ധ്യപ്പെടുത്തിയാല്‍ പദ്ധതിയോട് പൂര്‍ണമായി സഹകരിക്കുമെന്ന് എംഎല്‍എമാര്‍ കളക്ടര്‍ ഉറപ്പ് നല്‍കി. എംഎല്‍എമാരുടെ നിര്‍ദ്ദേശങ്ങള്‍ അംഗീകരിച്ച കളക്ടര്‍ പ്രദേശത്തെ എല്ലാവര്‍ക്കും നോട്ടീസ് നല്‍കുന്ന നടപടി ഇന്ന് മുതല്‍ തുടങ്ങുമെന്ന് അറിയിച്ചു. ഭൂവുടമള്‍ക്ക് നല്‍കുന്ന നോട്ടീസില്‍ നഷ്ടപ്പെടുന്ന എല്ലാ വസ്തുക്കളെയും കുറിച്ചുള്ള വിവരങ്ങള്‍ ഉള്‍പ്പെടുത്തും. നഷ്ടപ്പെടുന്ന വസ്തുക്കളുടെ എണ്ണം, അവര്‍ക്ക് നല്‍കുന്ന നഷ്ട പരിഹാരം എന്നിവ രേഖപ്പെടുത്തും. ഇതിന് പുറമെ അലൈന്‍മന്റ് രേഖപ്പെടുത്തി നല്‍കും. പൊതു ജനങ്ങളുടെ ആശങ്ക തീര്‍ക്കാന്‍ റവന്യു ഉദ്യോഗസ്ഥര്‍, ഗെയില്‍ പ്രതിനിധികള്‍, തുടങ്ങിയവരും സംഘത്തിലുണ്ടാവും. അനാവശ്യമായി ഭീതി പരത്തുന്ന രീതിയില്‍ പോലീസിനെ ഇത്തരം പ്രവര്‍ത്തനങ്ങളില്‍ ഉപയോഗിക്കില്ലെന്ന് കളക്ടര്‍ അറിയിച്ചു.
ഭൂഉടമകള്‍ക്ക് കാര്‍ഷിക നഷ്ടം കണക്കാക്കി നല്‍കുന്നതിന് ജില്ലക്ക് മാത്രമായി പ്രത്യേക പക്കേജുണ്ടാക്കും. ഇതിനായി ക്യഷിവകുപ്പും ജനപ്രതിനിധികളും ചേര്‍ന്ന് സമിതി ഉടന്‍ രൂപീകരിക്കും. പദ്ധതിക്ക് നിര്‍ദ്ദേശിച്ച സ്ഥലത്തുള്ള ഒരു വീടിനും നാശ നഷ്ടമുണ്ടാവില്ല. അമ്പലങ്ങളും പള്ളികളും ശ്മശാനങ്ങളും സംരക്ഷിക്കും. 10 സെന്റിന് താഴെ സ്ഥലമുള്ള പ്രദേശങ്ങളില്‍ സ്ഥലത്തിന്റെ അരിക് ചേര്‍ന്ന് നിര്‍മ്മാണം നടത്തും. ഭൂമിയുടെ ഉടമവാസ്ഥാവകാശം ഭൂവുടമയില്‍ തുടരും. പ്രദേശത്തിന്റെ സമീപം നിര്‍മ്മാണ പ്രവര്‍ത്തനങ്ങള്‍ വിലക്കിയിട്ടില്ല.
ജില്ലയില്‍ 14 വില്ലേജുകളിലായി 58.54 കിലോമീറ്ററാണ് പൈപ്പ് ഇടുന്നത്. ഇതില്‍ ഒരുകിലോമീറ്ററോളം സ്ഥലത്ത് ആദ്യ ഘട്ടം പണി തുടങ്ങി. ബാക്കിയുളളവര്‍ക്കാണ് നോട്ടീസ് നല്‍കുന്ന നടപടി തുടങ്ങുക.
കളക്‌ട്രേറ്റില്‍ നടന്ന യോഗത്തില്‍ എം.ഐ.ഷാനവാസ് എംപി എംഎല്‍എമാരായ പി.ഉബൈദുള്ള, അഡ്വ.എം.ഉമ്മര്‍, പി.കെ.ബഷീര്‍, ആബിദ് ഹുസൈന്‍ തങ്ങള്‍, അസി.കളക്ടര്‍ അരുണ്‍.കെ.വിജയന്‍, ഡെപ്യുട്ടി കളക്ടര്‍മാരായ വി.രാമചന്ദ്രന്‍, ഡോ. ജെ. ഒ. അരുണ്‍, സി. അബ്ദുല്‍ റഷീദ്, ആര്‍ഡിഒ അജീഷ് കെ., ഗെയില്‍ ഡിജിഎം എന്‍. എസ്. പ്രസാദ്, പഞ്ചായത്ത് പ്രസിഡന്റുമാരായ കെ.ടി. ഉമ്മുകുല്‍സു, കമ്മദ്കുട്ടി, ഷാജി.സി.പി., മുനര്‍വര്‍, സുമയ്യ സലിം എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: