ആലപ്പുഴ: കുട്ടികളുടെ ജീവിതത്തില് നിന്ന് മലയാളം ഭാഷ വിട്ടുപോകാന് അനുവദിക്കരുതെന്നും മലയാളത്തിന്റെ നന്മ അവര്ക്കു പകര്ന്നു നല്കണമെന്നും ജില്ല കളക്ടര് ടി.വി അനുപമ പറഞ്ഞു. വിവര പൊതുജന സമ്പര്ക്ക വകുപ്പും ജില്ല ഭരണകൂടവും ചേര്ന്ന് സംഘടിപ്പിച്ച കേരളപ്പിറവി ദിനാഘോഷവും ഭരണഭാഷ വാരാഘോഷം എന്നിവയുടെ ജില്ലാതല ഉദ്ഘാടനവും നിര്വ്വഹിക്കുകയായിരുന്നു കളക്ടര്. ജീവിതത്തിന്റെ എല്ലാ മേഖലകളിലും മലയാളത്തിന് പ്രാധാന്യം നല്കണം.
എസ്ഡി കോളേജ് മലയാളം വിഭാഗം അസി.പ്രൊഫ. ഡോ. എസ്. അജയകുമാര് മുഖ്യ പ്രഭാഷണം നടത്തി. എഡിഎം ഐ.അബ്ദുള് സലാം അദ്ധ്യക്ഷനായി. വിദ്യാഭ്യാസ ഉപ ഡയറക്ടര് കെ.പി.ലതിക ഭാഷാ പ്രതിജ്ഞ ചൊല്ലിക്കൊടുത്തു. ജില്ലാ ഇന്ഫര്മേഷന് ഓഫീസര് ചന്ദ്രഹാസന് വടുതല സ്വാഗതവും അസി. ഇന്ഫര്മേഷന് ഓഫീസര് കെ.ബി.ശ്രീകല നന്ദിയും പറഞ്ഞു.
