ഇത്തി

ശാസ്ത്രീയ നാമം: ::Ficus tinctoria

സംസ്‌കൃതം: പലക്ഷ

തമിഴ്: കല്‍പെരികം, കല്ലിത്തി.

ആല്‍ വര്‍ഗ്ഗത്തില്‍ ഉള്‍പ്പെട്ട മരമാണ് ഇത്തി. വെളുത്ത ഇത്തി, കറുത്ത ഇത്തി എന്നിങ്ങനെ രണ്ടുതരമുണ്ട്.

എവിടെ കാണാം: ഇന്ത്യയിലുടനീളം കാണാം. 2000 മീറ്റര്‍ വരെ ഉയരമുള്ള സ്ഥലങ്ങളില്‍ വളരുന്നു.

പ്രത്യുല്‍പാദനം എങ്ങനെ: കമ്പ് കുഴിച്ചിട്ട് പുനരുത്പാദിപ്പിക്കാം.

കറുത്ത ഇത്തിയാണ് സാധാരണ കണ്ടുവരുന്നത്. വെളുത്ത ഇത്തി ഉഷ്ണമേഖലയിലാണ് കണ്ടുവരുന്നത്. കറുത്ത ഇത്തി ഹൈറേഞ്ച് മേഖലയില്‍ ധാരാളമുണ്ട്. ഔഷധങ്ങളില്‍ ഇത് രണ്ടും ഒരുപോലെ ഉപയോഗിക്കുന്നു. കറുത്ത ഇത്തിയുടെ ഇല ചെറുതായിരിക്കും. മരത്തിന് ഇരുണ്ട നിറമായിരിക്കും. വെളുത്ത ഇത്തിയുടെ ഇല പേപ്പറുപോലെ അല്‍പം വിസ്തൃതമായിരിക്കും. വെള്ള നിറമായിരിക്കും.

ഔഷധപ്രയോഗങ്ങള്‍; ആയുര്‍വേദത്തില്‍ അറിയപ്പെടുന്ന നാല്‍പാമരത്തില്‍ ഒന്നാണ് ഇത്തി. അത്തി, ഇത്തി, അരയാല്‍, പേരാല്‍ എന്നിവയാണ് നാല്‍പാമരം എന്നറിയപ്പെടുന്നത്. നീര്, വ്രണങ്ങള്‍ ഇവ ശമിപ്പിക്കാന്‍ നാല്‍പാമര തൊലി ഉപയോഗിക്കുന്നു.

വ്രണം പഴുത്താല്‍ ഇത് ശുദ്ധമാക്കാന്‍ വേണ്ടി നാല്‍പാമര തൊലി ഇട്ടുവെന്ത വെള്ളത്തില്‍ വ്രണം കഴുകുകയും ധാര കോരുകയും ചെയ്യുന്നു.

ഒടിവ്, ചതവ് ഇവയ്‌ക്ക് ഉണ്ടാക്കുന്ന തൈലങ്ങളില്‍ ഇത്തി ധാരാളമായി ഉപയോഗിക്കുന്നു.

സ്ത്രീകള്‍ക്കുണ്ടാകുന്ന യോനി രോഗങ്ങളില്‍ നാല്‍പാമര തൊലിയിട്ട് വെന്ത വെള്ളത്തില്‍ കഴുകുന്നതും ധാരകോരുന്നതും നല്ലതാണ്.

വ്രണഭൈരവ തലത്തില്‍ ഇത്തിയുടെ പാല്‍ ഉണക്കി കട്ടിയാക്കി ഉപയോഗിക്കുന്നു

പ്രസവശേഷം വയര്‍ ഒതുങ്ങുന്നതിന് നാല്‍പാമര തൊലിയും നാല്‍പാമരത്തിന്റെ ഇലകളും ചേര്‍ത്ത് വെള്ളം ചൂടാക്കി അതുപയോഗിച്ച് വയറും വസ്തിപ്രദേശവും കഴുകുകയും ആ വെള്ളത്തില്‍ ഇരിക്കുകയും ചെയ്താല്‍ പ്രസവത്താല്‍ വികസിച്ച ശരീര ഭാഗങ്ങളെല്ലാം പൂര്‍വ്വസ്ഥിതിയിലാകും. വയറും അരഭാഗവും ഒതുക്കുന്നതിന് നാല്‍പാമരംകൊണ്ട് കിഴികെട്ടി അമര്‍ത്തി തിരുമ്മുന്നത് സഹായിക്കും. നാല്‍പാമര തൊലിയും ഇലയും ഓരോന്ന് 50 ഗ്രാം വീതം എടുത്താണ് കിഴികെട്ടുന്നത്. ഈ കിഴിയിട്ടാണ് വെള്ളം ചൂടാക്കുന്നത്. പ്രസവിച്ച് 15 ദിവസം കഴിഞ്ഞാണ് ഇതു ചെയ്യേണ്ടത്. ഏഴ് ദിവസം തുടര്‍ച്ചയായി ചെയ്യണം.

ഇത്തിയുടെ ഇല ഇടിച്ചുപിഴിഞ്ഞ നീര് 20 മില്ലി വീതം ദിവസം രണ്ടുനേരം സേവിച്ചാല്‍ പനിക്ക് ശമനമുണ്ടാകും. ഗര്‍ഭിണികളുടെ രക്താതിസാരത്തിന് നാല്‍പ്പാമരത്തിന്റെ തളിരില(ഓരോ ഇലയും മൂന്ന് ഗ്രാം വീതം)തൈരില്‍ അരച്ച് സേവിക്കുക. ഇത്തി ഇല കറവപശുവിന് കൊടുത്താല്‍ പാല്‍ കൂടുതല്‍ ലഭിക്കും. കൊഴുപ്പിന്റെ അംശം കൂടുകയും ചെയ്യും.