കണ്ണൂര്: സൈന്യവുമായുണ്ടായ ഏറ്റുമുട്ടലില് കൊല്ലപ്പെട്ട ഐഎസ് ഭീകരരുടെ കുടുംബാംഗങ്ങള് ഇപ്പോഴും സിറിയയില് തന്നെ. ഗള്ഫ് കേന്ദ്രീകരിച്ച് വന്ന ഫോണ് കോളുകളാണ് കണ്ണൂരില് നിന്ന് ഐഎസില് ചേര്ന്നവരെക്കുറിച്ചുള്ള വിവരങ്ങള് പോലീസിന് ലഭിച്ചത്. 2014 ലാണ് റിഷാല് കുടുംബസമേതം സിറിയയിലേക്ക് പോയത്. റിഷാല് കൊല്ലപ്പെട്ടെങ്കിലും ഭാര്യ ഹുദ ഇപ്പോഴും സിറിയയില് തന്നെയാണുള്ളത്. ഐഎസ് കേന്ദ്രത്തില് ഭര്ത്താവ് കൊല്ലപ്പെട്ടു, എനിക്ക് എങ്ങിനെയെങ്കിലും ഈ കേന്ദ്രത്തില് നിന്ന് നാട്ടിലേക്ക് വരണം. ഉമ്മ എന്തെങ്കിലും ചെയ്തുതരണം… റിഷാലിന്റെ ഭാര്യ മാഹിയിലെ ഹുദയുടെ വാക്കുകളാണിത്. കഴിഞ്ഞദിവസം സിറിയയില് കൊല്ലപ്പെട്ടവരുടെ പോലീസ് പുറത്തുവിട്ട കൂട്ടത്തില് റിഷാലിന്റെ ഫോട്ടോയും ഉണ്ടായിരുന്നു. കേന്ദ്ര രഹസ്യാന്വേഷണ വിഭാഗവും ഇത് സ്ഥിരീകരിച്ചിട്ടുണ്ട്.
പാപ്പിനിശ്ശേരി പഴഞ്ചിറ പള്ളിക്ക് സമീപം താമസിക്കുന്ന ടി.വി.ഷമീര് കുടുംബസമേതം ദുബായില് നിന്ന് സിറിയയിലേക്ക് പോയതാണ്. അവിടെവെച്ച് സമീറും മകന് സല്മാനും കൊല്ലപ്പെട്ടു. സമീറിന്റെ ഭാര്യ ഫൗസിയ, മക്കളായ സഫ്വാന്, നാജിയ എന്നിവര് ഇപ്പോഴും സിറിയയിലെ ഐഎസ് കേന്ദ്രത്തില് തന്നെയാണുള്ളത്. ഭര്ത്താവും മൂത്തമകനും കൊല്ലപ്പെട്ടതായി ഫൗസിയയുടെ സന്ദേശമുണ്ടെന്നാണ് രഹസ്യാന്വേഷണ വിഭാഗവും പോലീസും പറയുന്നത്. സഫ്വാന് സുഹൃത്ത് മനാഫുമൊത്ത് സിറിയയില് പുഴയില് കുളിക്കുന്ന ഫോട്ടോ സമീപകാലത്ത് കേന്ദ്ര രഹസ്യാന്വേഷണ ഏജന്സി പുറത്തുവിട്ടിരുന്നു.
ചക്കരക്കല്ല് മുണ്ടേയിയിലെ മുഹമ്മദ് ഷാജിലും കുടുംബസമേതമാണ് സിറിയയിലെത്തിയത്. 2016 ഒക്ടോബറിലാണ് ഇവര് നാട്ടില് നിന്നും പോയത്. ഷാജിലിന്റെ ഭാര്യ ഫഹസാന, മകള് മിസ്ബ, മകന് അബ്ദുള്ള ദാഹിം എന്നിവര് ഇപ്പോഴും സിറിയിലാണുള്ളത്. ഫഹസാന ഏതാനും മാസങ്ങള്ക്ക് മുമ്പ് വീട്ടില് ഫോണ് സന്ദേശം അയച്ചതായി രഹസ്യാന്വേഷണ വിഭാഗം സ്ഥിരീകരിച്ചിട്ടുണ്ട്. ഷാജില് സിറിയിയില് കൊല്ലപ്പെട്ടതായും അയാളുടെ മരണാനന്തര കര്മ്മങ്ങള് ചെയ്യണമെന്നും ആവശ്യപ്പെട്ടാണ് സന്ദേശമെത്തിയത്. ഐഎസില് ചേര്ന്നവരുടെ ബന്ധുക്കളെ കേന്ദ്രീകരിച്ച് വിശദമായ അന്വേഷണം നടത്തി കൂടുതല് തെളിവുകള് ശേഖരിക്കാനാണ് പോലീസിന്റെ ശ്രമം.
