ആലപ്പുഴ: മദ്യപിച്ച് ബഹളമുണ്ടാക്കിയെന്ന പേരില് കസ്റ്റഡിയിലെടുത്ത യുവാവിനെ ആലപ്പുഴ നോര്ത്ത് പോലീസ് സ്റ്റേഷനിലെ എസ് ഐ ഉള്പ്പടെയുള്ളവര് ക്രൂരമായി മര്ദ്ദിച്ചെന്നു പരാതി.
അവശനിലയിലായ ഇയാളെ ആലപ്പുഴ ജുഡീഷ്യല് മജിസ്ട്രേറ്റ് കോടതിയില് ഹാജരാക്കുകയും കോടതിയുടെ നിര്ദ്ദേശാനുസരണം ആലപ്പുഴ ജനറല് ആശുപത്രിയില് പ്രവേശിപ്പിക്കുകയും ചെയ്തു. ആലപ്പുഴ കാളാത്ത് സ്വദേശി ഫൈസല്(40) ആണ് പോലീസിന്റെ ക്രൂരമായ മര്ദ്ദനമേറ്റ് ആശുപത്രിയില് കഴിയുന്നത്.
കഴിഞ്ഞ ദിവസമാണ് സംഭവം. മദ്യപിച്ച് ബഹളമുണ്ടാക്കിയതിനെത്തുടര്ന്ന് സ്റ്റേഷനില് കൊണ്ടുവന്ന ഫൈസലിനെ രാത്രി മുഴുവന് മര്ദ്ദിച്ചെന്നാണ് പരാതി.
രാവിലെ സ്റ്റേഷനുള്ളില് നിന്നുള്ള അലറിക്കരച്ചില് കേട്ട് സമീപത്തുള്ളവര് സ്റ്റേഷന് മുന്നിലെത്തിയതോടെ കാര്യങ്ങള് പന്തിയല്ലെന്ന് മനസിലാക്കുകയും വാറണ്ടുകേസിലെ പ്രതികൂടിയായ ഇയാളെ കോടതിയില് ഹാജരാക്കുകയുമായിരുന്നു.
പോലീസുകാര് മര്ദ്ദിച്ചെന്നും അവശനാണെന്നും ഇയാള് നല്കിയ മൊഴിയെത്തുടര്ന്നാണ് കോടതി ആശുപത്രിയിലേയ്ക്ക് മാറ്റുവാന് നിര്ദ്ദേശിച്ചത്. ഇയാളുടെ ആരോഗ്യനിലയെ സംബന്ധിച്ച് റിപ്പോര്ട്ട് നല്കാന് ആശുപത്രി സൂപ്രണ്ടിനോട് നിര്ദ്ദേശിച്ചിട്ടുമുണ്ട്.
