കല്ലടിക്കോട്:സംസ്ഥാനത്ത് വ്യാജ തേന് വില്പ്പന വ്യാപകമാകുന്നു. അട്ടപ്പാടി,വയനാട്, നീലഗിരി, നെല്ലിയാമ്പതി, ഇടുക്കി തുടങ്ങി മലയോര മേഖലകളിലാണ് തേന് ഉത്പാദനം കൂടുതലായി നടക്കുന്നത്.
എന്നാല് ഇവിടങ്ങളില് നിന്ന് ഉത്പാദിപ്പിക്കുന്ന തേനെന്ന വ്യാജേന ജനങ്ങളുടെ വിശ്വാസം മുതലെടുത്താണ് സംസ്ഥാനത്ത് വ്യാജ തേന് വില്പ്പന നടക്കുന്നത്. കഴിഞ്ഞ ദിവസം അട്ടപ്പാടിയില് നിന്നും വ്യജ തേന് വില്പ്പന നടത്തിയിരുന്ന സംഘത്തെ പിടികൂടിയിരുന്നു. ഇവരുടെ പക്കല് നിന്നും പിടികൂടിയ തേന് ശരീരത്തിന് ദോഷം ചെയ്യുന്ന കെമിക്കലുകള് ചേര്ത്തുണ്ടാക്കിയതാണെന്നാണ് വിദഗ്ദര് പറയുന്നത്.
ഇത്തരത്തില് വ്യാജ തേന് വിതരണം ചെയ്യുന്ന സംഘങ്ങള്ക്ക് പുറകില് വന്മാഫിയ തന്നെയുണ്ടെന്നാണ് പോലീസ് പറയുന്നത്.
അന്യ സംസ്ഥാനങ്ങളില് നിന്ന് ശര്ക്കര പനീയത്തില് പലവിധ ചേരുവകകള് ചേര്ത്ത് തേനെന്ന പേരില് വില്പ്പന നടത്തുന്ന സംഘങ്ങളും കേരളത്തില് വ്യാപകമാണ്.
വീട്ടിലെ തറകളുടെയും മരപ്പൊത്തുകളിലും കാണപ്പെടുന്ന ചെറു തേനീച്ച കാടുകളില് വ്യാപകമായി ഉണ്ടാവില്ല. ഇവയെ കൂട്ടിലാക്കി വളര്ത്തി തേന് എടുക്കുകയാണ് സാധരണയായി കര്ഷകര് ചെയ്യുന്നത്. വര്ഷത്തില് ഒരിക്കല് ഒരു കൂട്ടില് നിന്നും 200 ഗ്രാം തേനാണ് ലഭിക്കുക. കേരളത്തില് പല കര്ഷകരും ഒറ്റപ്പെട്ട് ചെറുതേന് കൃഷി ചെയ്യുന്നുണ്ട്.
കര്ഷകര് സംഘടിതമായി കൃഷി ചെയ്യുന്നത് തച്ചമ്പാറ പഞ്ചായത്ത് കേന്ദ്രീകരിച്ചാണ്. ഇവിടെയെല്ലാം ഉത്പാദിപ്പിക്കുന്ന തേനിന് ആവശ്യക്കാര് ഏറെയാണ്. കിലോക്ക് രണ്ടായിരം രൂപയാണ് ചെറു തേനീന്റെ വില. എന്നാല് വ്യാജ ചെറു തേനീന് വിപണിയില് വില 600 രൂപയാണ്.
ഈ വിലക്ക് യഥാര്ത്ഥ ചെറു തേന് നല്കാന് കര്ഷകര്ക്കു കഴിയില്ലെന്നും വില കുറച്ചു കിട്ടുന്നത് വിലകുറഞ്ഞ വന്തേനാണെന്നും കര്ഷകര് പറയുന്നു.
കാട്ടുതേന്, ചെറുതേന് എന്നീ പേരുകളില് വില്ക്കുന്ന തേനിന് ഇത്തരത്തില് വില്പ്പന നടത്തുന്ന വ്യാജതേനുമായി യാതൊരു ബന്ധവും ഉണ്ടായിരിക്കില്ലെന്ന്് തേനീച്ച കര്ഷകര് പറയുന്നു.
ഏറ്റവും ഔഷധ ഗുണമുള്ളതും ക്യാന്സറടക്കമുള്ള രോഗങ്ങള്ക്ക് ഉപയോഗിക്കുന്നതുമായ ചെറുതേന് അധികവും വലിയ തേനോ വ്യാജനോ ആയിരിക്കുമെന്നാണ് തച്ചമ്പാറ അമൃതം ചെറു തേനീച്ച കര്ഷക സമിതി സെക്രട്ടറി ഉബൈദുള്ള എടായ്ക്കല് പറയുന്നത്. വ്യാജ തേന് വ്യാപകമായി വിറ്റഴിക്കുന്നത് ജനങ്ങളുടെ ആരോഗ്യത്തിന് ഭീഷണിയാവുമെന്നും സര്ക്കാര് നടപടിയെടുക്കണമെന്നുമാണ് തേന് കര്ഷകര് ആവശ്യപ്പെടുന്നത്.
