അമ്പലപ്പുഴ: റവന്യു ജില്ലാ കായിക മേളയുടെ രണ്ടാം ദിവസമായ ഇന്നലെ വാശിയേറിയ പോരാട്ടത്തില് ആലപ്പുഴ സബ് ജില്ല മുന്നില്. പതിനൊന്നു സബ്ജില്ലകള് മാറ്റുരക്കുന്ന കായികമേളയില് 203 പോയിന്റോടെ ആലപ്പുഴ സബ് ജില്ല ലീഡു നിലനിര്ത്തി.
156 പോയിന്റോടെ ചേര്ത്തല രണ്ടാം സ്ഥാനത്തും 78 പോയിന്റോടെ മാവേലിക്കരയും ലീഡുചെയ്യുന്നു. സ്കൂള് തലത്തില് ആലപ്പുഴ ലിയോതേര്ട്ടീന്ത് ഹയര് സെക്കന്ററി സ്കൂള് 59 പോയിന്റു നേടി ഒന്നാം സ്ഥാനത്തു നില്ക്കുന്നു. 57 പോയിന്റോടെ ചാരമംഗലം ഡിവിഎച്ച്എസ് രണ്ടാം സ്ഥാനത്തും 51 പോയിന്റോടെ മറ്റം സെന്റ് ജോണ്സ് എച്ച്എസ്എസും 50 പോയിന്റോടെ ആലപ്പുഴ എസ്ഡിവിബിഎച്ച് എസ്എസ് മൂന്നാം സ്ഥാനത്തും മുന്നേറുന്നു.
രാവിലെ മുതല് പെയ്ത ചെറിയ ചാറ്റല് മഴയിലും വാശിയേറിയ മത്സരമാണ് നടന്നത്. മത്സരങ്ങള് വൈകുന്നതും കഴിഞ്ഞ ദിവസം പെയ്ത മഴയില് ട്രാക്കു നനഞ്ഞു കിടന്നതും ബുദ്ധിമുട്ടുണ്ടാക്കിയതായി മത്സരാര്ത്ഥികള് പറഞ്ഞു. കായികമേളയുടെ ഉദ്ഘാടനം ജില്ലാ പഞ്ചായത്ത് വിദ്യാഭ്യാസ സ്റ്റാന്റിങ് കമ്മറ്റി ചെയര്മാന് അഡ്വ. കെ.റ്റി. മാത്യു നിര്വഹിച്ചു. വെള്ളിയാഴ്ച ആരംഭിച്ച മേള ഇന്ന് സമാപിക്കും.
അറവുകാട് ഉദ്ഘാടന സമ്മേളനത്തില് പ്രജിത്കാരിക്കല് അദ്ധ്യക്ഷനായി. ഇന്ന് വൈകിട്ട് 4.30ന് സമാപന സമ്മേളനവും സമ്മാനദാനവും ജില്ലാ പഞ്ചായത്ത് പ്രസിഡന്റ് ജി. വേണുഗോപാല് നിര്വഹിക്കും. ഗ്രാമപഞ്ചായത്ത് പ്രസിഡന്റ് എം. ഷീ ജ. അദ്ധ്യക്ഷനാകും.
