വളപട്ടണം: കളരിവാതുക്കല് ക്ഷേത്രത്തിന്റെ ഭാഗമായ നൂറ്റാണ്ടുകള് പഴക്കമുളള കോട്ടകവാടം തകര്ത്ത സംഭവത്തില് വ്യാപക പ്രതിഷേധമുയരുന്നു.
ചിറക്കല് ദേവസ്വത്തിനു കീഴിലെ വളപട്ടണം കളരിവാതുക്കല് ഭഗവതി ക്ഷേത്രത്തിന്റെ ഉടമസ്ഥതയിലുളള വളപട്ടണം കോട്ടപ്പടിക്കുന്നിലെ കോട്ടകവാടമാണ് കഴിഞ്ഞ ദിവസം രാത്രി തകര്ക്കപ്പെട്ടത്. നൂറ്റാണ്ടുകള്ക്ക് മുമ്പ് കോലത്തിരി രാജവംശത്തിലെ വല്ലഭന് കോലത്തിരി രാജാവ് വളപട്ടണം കേന്ദ്രീകരിച്ചായിരുന്നു രാജഭരണം നടത്തിയതെന്ന് ചരിത്ര രേഖകളില് കാണാം. തകര്ന്ന കോട്ടയുടെ ഏക അവശിഷ്ടമായ കവാടമാണ് ഇപ്പോള് തകര്ത്തിരിക്കുന്നത്.
ദേവസ്വം ബോര്ഡ് അധികാരികളും പോലീസും സ്ഥലത്തെത്തി അന്വേഷണം നടത്തിയെങ്കിലും കവാടം തകര്ത്തവരെ കണ്ടെത്താനോ നിയമത്തിനു മുന്നില് കൊണ്ടുവരാനോ തയ്യാറാകാത്ത അധികൃതരുടെ നടപടിയില് ഹൈന്ദവ വിശ്വാസികള്ക്കിടയില് വ്യാപകമായ പ്രതിഷേധം ഉയര്ന്നിട്ടുണ്ട്.കോട്ട കവാടത്തിന് സമീപത്തെ ക്ഷേത്രഭൂമിയില് അനധികൃത നിര്മ്മാണം നടക്കുന്നതിനെതിരെ ദേവസ്വം ഭരണസമിതി വളപട്ടണം പോലീസില് നേരത്തെ പരാതി നല്കിയിരുന്നു. തുടര്ന്ന് പ്രവര്ത്തി നിര്ത്തിവെച്ചിരുന്നു. ക്ഷേത്രഭൂമിയിലെ കവാടം അനധികൃതമായി കടന്ന കയ്യേറി നശിപ്പിച്ചതിനെതിരെ ബഹുജന പ്രക്ഷോഭം സംഘടിപ്പിക്കാനുളള തയ്യാറെടുപ്പിലാണ് നാട്ടുകാര്.
