കോട്ടയം: ആതുരസേവന രംഗത്ത് 48 വര്ഷത്തിലധികമായി പ്രവര്ത്തിച്ചുവരുന്ന ഭാരത് ഹോസ്പിറ്റലിനെ തകര്ക്കുവാനുള്ള ഗൂഢനീക്കം എന്തുവിലകൊടുത്തും ചെറുക്കുമെന്ന് ഭാരത് ഹോസ്പിറ്റല് സംരക്ഷണ സമിതി പ്രഖ്യാപിച്ചു.
കോട്ടയം നഗരത്തിന്റെ ഹൃദയഭാഗത്ത് സ്തുത്യര്ഹമായ സേവനമാണ് ഈ ആശുപത്രി നടത്തിവരുന്നത്. തെറ്റിദ്ധാരണകള് പരത്തി ആശുപത്രിയുടെ പ്രവര്ത്തനം സ്തംഭിപ്പിക്കാനാണ് ഇവിടെ ജോലി ചെയ്തുവന്നിരുന്ന ചില നഴ്സുമാര് നടത്തുന്നത്. കരാര് വ്യവസ്ഥയില് ജോലി ചെയ്തിരുന്ന ഇവര് ആശുപത്രിക്കെതിരെ കുപ്രചാരണങ്ങള് അഴിച്ചുവിടുകയായിരുന്നു. നഴ്സിംഗ് സൂപ്രണ്ട് അപമര്യാദയായി പെരുമാറിയെന്നും ഒരിക്കല് ഉപയോഗിച്ച ഗ്ലൗസുകള് വീണ്ടും ഉപയോഗിക്കുന്നു എന്നുമായിരുന്നു ആദ്യത്തെ ആരോപണം. മാനേജ്മെന്റ് നടത്തിയ അന്വേഷണത്തില് ഇത് തെറ്റാണെന്ന് തെളിഞ്ഞപ്പോള് വസ്ത്രം മാറുന്നിടത്ത് ക്യാമറ വച്ചുവെന്ന പരാതി ഉന്നയിച്ചു. ഇതും തെറ്റായ പരാതിയെന്ന് കണ്ടെത്തി. തുടര്ന്ന് കരാര് അടിസ്ഥാനത്തില് ജോലി ചെയ്തിരുന്ന ചില നഴ്സുമാര് യുണൈറ്റഡ് നഴ്സസ് അസോസിയേഷന്റെ കീഴില് സമരത്തിന് എത്തി. ഇതിന്റെ പിന്നില് ചില രാജ്യദ്രോഹ ശക്തികള് കടന്നുകയറി പ്രവര്ത്തിച്ചിരുന്നുവെന്ന് പിന്നീട് ഇവര് നടത്തിയ സമ്മേളനത്തോടെ ജനങ്ങള് മനസ്സിലാക്കി. ജോലിയില് മികവുപുലര്ത്താത്ത കരാര് കാലാവധി കഴിഞ്ഞ നഴ്സുമാരെ വീണ്ടും നിയമിക്കണമെന്ന ആവശ്യം മാനേജ്മെന്റ് തള്ളിയിരുന്നു.
അടിസ്ഥാന രഹിതമായ പ്രചാരണങ്ങള് നടത്തി സമരം ചെയ്ത് സ്ഥാപനത്തെ പൂട്ടിക്കാമെന്ന് ആരും കരുതേണ്ടെന്ന് സമ്മേളനത്തില് അദ്ധ്യക്ഷത വഹിച്ച മുന് നഗരസഭാ വൈസ് ചെയര്മാന് പിഎന്കെ പിള്ള പറഞ്ഞു.
ഹിന്ദു ഇക്കണോമിക് ഫോറം അദ്ധ്യക്ഷന് എന്. വെങ്കിടകൃഷ്ണ് പോറ്റി സമ്മേളനം ഉദ്ഘാടനം ചെയ്തു. ആശുപത്രിക്കെതിരെ നടക്കുന്ന സമരത്തെ തുറന്നുകാണിച്ചുകൊണ്ട് ടി.സി. ഗണേഷ് സംസാരിച്ചു. എന്എസ്എസ് താലൂക്ക് യൂണിയന് സെക്രട്ടറി എ.എം. രാധാകൃഷ്ണന് നായര്, മുന് നഗരസഭാ ചെയര്മാന് കെആര്ജി വാര്യര്, ബി. ഗോപകുമാര്, ആര്എസ്എസ് വിഭാഗ് സംഘചാലക് എം.എസ്. പത്മനാഭന്, ജി. അരവിന്ദന്, എസ്. രാമനാഥന്, വിവിധ റെസിഡന്റ്സ് അസോസിയേഷന് ഭാരവാഹികള്, ഹിന്ദു സംഘടനാ നേതാക്കള് തുടങ്ങിയവര് സംസാരിച്ചു.
