തിരുവന്തപുരം: ജില്ലയില് കനത്തമഴ ലഭിച്ചതോടെ ഡാമുകളില് ജലനിരപ്പ് ഉയര്ന്നു. നെയ്യാര്ഡിമാന്റെ നാല് ഷട്ടറുകള് തുറന്നുവിട്ടു. മഴ ശക്തമായതോടെ നെടുമങ്ങാട്, കാട്ടാക്കട, നെയ്യാറ്റിന്കര താലൂക്കുകളില് അതീവ ജാഗ്രതാ നിര്ദ്ദേശവും മറ്റ് താലൂക്കുകളില് ജാഗ്രതാ നിര്ദ്ദേശവും നല്കിയിട്ടുണ്ട്. രക്ഷാ പ്രവര്ത്തനങ്ങള്ക്കായി താലൂക്കോഫീസുകള് കേന്ദ്രീകരിച്ച് 24 മണിക്കൂറും പ്രവര്ത്തിക്കുന്ന കണ്ട്രോള് റൂമുകള് തുറന്നിട്ടുണ്ട്. ഇന്നലെ മാത്രം 23.9 സെന്റീമീറ്റര് മഴയാണ് ജില്ലയില് ലഭിച്ചത്.
ശനിയാഴ്ച രാത്രിയോടെ ആരംഭിച്ച മഴ പുലര്ച്ചയോടെ ശക്തി പ്രാപിക്കുകയായിരുന്നു. വൃഷ്ടിപ്രദേശങ്ങളില് മഴ കനത്തതോടെ നെയ്യാര്, പേപ്പാറ ഡാമുകളില് ജലനിരപ്പ് ഉയര്ന്നു. നെയ്യാര് നദിയുടെ ഇരുകരകളിലും ഉള്ളവര്ക്ക് ജാഗ്രതാ നിര്ദ്ദേശം രാവിലെ മുതല് നല്കിയിരുന്നു. ഉച്ചയോടെ നെയ്യാര് ഡാമിന്റെ നാല് ഷട്ടറുകള് തുറന്നുവിട്ടു. പേപ്പാറ ഡാമിനും നദിക്കരയിലും തമാസിക്കുന്നവര്ക്ക് ജാഗ്രതാ നിര്ദ്ദേശം നല്കിയിട്ടുണ്ട്.
ജില്ലയുടെ പലഭാഗങ്ങളിലും ശക്തമായ വെള്ളക്കെട്ട് അനുഭവപ്പെട്ടു. ചാക്ക ബൈപ്പാസിലുണ്ടായ വെള്ളക്കെട്ടില് ഏറെ നേരം ഗതാഗതം തടസ്സപ്പെട്ടു. നിരവധി സ്ഥലങ്ങളില് തണല്മരങ്ങള് നിലം പൊത്തി. മണ്ണന്തല പോലീസ് സ്റ്റേഷനുസമീപം തണല്മരങ്ങള് വീണ് മൂന്നുവീടുകള് ഭാഗികമായി തകര്ന്നു. പ്രണവം ഗാര്ഡന്സില് സുനില്കുമാര്, രാധാമണി, ഫിലിപ്പ് എന്നിവരുടെ വീടുകളാണ് തകര്ന്നത്. ജനറല് ആശുപത്രിയുടെ ഏഴാം വാര്ഡിനുമുകളില് മരം വീണത് രോഗികളില് പരിഭ്രാന്തി പരത്തി. നന്ദാവന് റോഡില് തണല്മരം വീണ് ഗതാഗതം തടസ്സപ്പെട്ടു. നിയമസഭാ മന്ദിരത്തിനുള്ളില് മരം വീണ് ഗാര്ഡ് ഷെഡ്ഡ് പൂര്ണ്ണമായും തകര്ന്നു. വികാസ് ഭവനിലും വന് മരങ്ങള് കടപുഴകി വീണു. ചാക്ക ആനയറയില് ചാത്തന്പാറ വീട്ടില് രാജേന്ദ്രന്റെ വീടിനുമുകളില് മരംവീണു. ടെക്നോപാര്ക്കിന് സമീപം ഇടവക്കോട് തേക്ക്മരം റോഡിലേക്ക് വീണ് മൂന്ന് വൈദ്യുതി പോസ്റ്റുകള് തകര്ന്നു. കാട്ടാക്കട കോവില്വിള, മലയിന്കീഴ് മച്ചയില് റോഡ്, വര്ക്കലയിലെ കിളിത്തട്ട് മുക്ക്, പാലക്കാവ്, വെണ്കുളം തുടങ്ങിയ സ്ഥലങ്ങളില് മരം വീണ് വൈദ്യുതി പോസ്റ്റുകള് തകര്ന്നു. ഈ മേഖലകളില് ഏറെ നേരം ഗതാഗതം തടസ്സപ്പെട്ടു.
മണക്കാട് ഗവ. ഗേള്സ് ഹയര്സെക്കന്ഡറി സ്കൂള് വളപ്പില് നിന്ന രണ്ടു മരങ്ങള് കടപുഴകി വീണു. അവധി ദിനമായതിനാല് വന് അപകടം ഒഴിവായി. ബേക്കറി ജംഗ്ഷന്, നന്ദാവനം, തിരുമല എന്നിവിടങ്ങളില് വീടുകളില് വെള്ളം കയറി. ബേക്കറി ജംഗ്ഷനില് ബാങ്കിന് എതിര്വശം പുഷ്പയുടെ വീട്ടിലും സമീപവാസിയുടെ വീട്ടിലുമാണ് വെള്ളം കയറിയത്. നന്ദാവനത്ത് പാരീസ് ലൈനിനു സമീപം ഓടയില് വെള്ളമിറങ്ങാതെ വന്നതോടെ സമീപത്തെ രണ്ടുവീടുകളില് വെള്ളം കയറി. ഡാം തുറന്ന് വിട്ടതോടെ തിരുമല ചെങ്കളൂരില് നാല് വീടുകളില് വെള്ളം കയറി. നഗരത്തിലെ തമ്പുരാന്മുക്ക്, നന്തന്കോട് എന്നിവിടങ്ങളില് മതില് ഇടിഞ്ഞുവീണു. നന്തന്കോട് മതില് ഇടിഞ്ഞ് വീണ് ചെറിയതുറ സ്വദേശി എഡ്വിന് തോമസിന്റെ കാര് തകര്ന്നു. ഗ്രാമപ്രദേശങ്ങളില് കൃഷിനാശം ഉള്പ്പെടെയുള്ളവ റിപ്പോര്ട്ട് ചെയതിട്ടുണ്ട്. വയലുകളിലും താഴ്ന്ന പ്രദേശങ്ങളിലും വെള്ളക്കെട്ട് രൂപപ്പെട്ടിടുണ്ട്. മരം വീണ് പലയിടങ്ങളിലും വൈദ്യുതി ബന്ധം തകരാറിലായി. മലയോര മേഖലയില് രാത്രികാലങ്ങളിലെ യാത്രയക്ക് നിയന്ത്രണം ഏര്പ്പെടുത്തയിട്ടുണ്ട്. വനമേഖലയില് രാത്രിയിലും ശക്തമായ മഴലഭിക്കുന്നുണ്ട്. അഗ്നിശമനസേന, റവന്യൂ ഉദ്യോഗസ്ഥര് തുടങ്ങിയവര്ക്ക് അതീവ ജാഗ്രതാ നിര്ദ്ദേശം നല്കിയിട്ടുണ്ട്.
