അരൂര്: തീരദേശ റയില്പാതയുടെ ഇരുവശങ്ങളിലും റോഡുകള് നിര്മ്മിച്ച് സഞ്ചാരയോഗ്യമാക്കണമെന്ന ആവശ്യം ശക്തമായി. റോഡുകള് നിര്മ്മിക്കണമെന്ന് ആവശ്യപ്പെട്ട് ശക്തമായ സമരം നടത്തുന്നതിന് റയില് പാതക്ക് ഇരുവശങ്ങളിലും താമസിക്കുന്നവരും, നാട്ടുകാരും, വിവിധ സംഘടനകളും സമരത്തിനൊരുങ്ങുന്നു.
കഴിഞ്ഞയിടെ റെയില് ദുരന്തത്തില് മൂന്നു യുവാക്കള് മരിക്കുവാനിടയായ സാഹചര്യത്തിലാണ് സഞ്ചാരയോഗ്യമായ റോഡുകള് നിര്മ്മിക്കണമെന്ന് ആവശ്യപ്പെട്ട് നാട്ടുകാര് രംഗത്തെത്തിയത്. റയില്വേ പാളത്തിന് സമീപമുള്ള ഒരു വീട്ടിലെ വിവാഹാഘോഷ ചടങ്ങുകള്ക്ക് ശേഷം രാത്രി ഒരു മണിയോടെ ബസ് സ്റ്റോപ്പിലേക്ക് പോകുന്നതിനായി റയില്പാളത്തിലൂടെ സഞ്ചരിക്കുന്നതിനിടയിലാണ് ഇതുവഴിയെത്തിയ മെമു ട്രെയിനിടിച്ച് മൂന്നു പേരും ദാരണമായി മരിക്കുവാനിടയായത്.
സ്വതന്ത്രമായി സഞ്ചരിക്കുവാന് മാര്ഗ്ഗമില്ലാത്തതിനെ തുടര്ന്നാണ് മരണപ്പെട്ടവര് റയില്വേ ലൈനിലൂടെ സഞ്ചരിക്കുവാന് നിര്ബന്ധിതരായത്. വഴിയുണ്ടായിരുന്നവെങ്കില് റയില്പാളത്തിലൂടെ ഇവര് സഞ്ചരിക്കുമായിരുന്നില്ലെന്നും ഇത്തരം ഒരു അപകടം ഒഴിവാക്കുവാന് കഴിയുമായിരുന്നുവെന്നും ചൂണ്ടികാട്ടുന്നു.
ഉണ്ടായിരുന്ന വഴികള് സംരക്ഷിച്ചും നാട്ടുകാര്ക്ക് സഞ്ചാരസ്വാതന്ത്യം അനുവദിക്കുകയും ചെയ്തിരുന്നുവെങ്കില് ഒരു പരിധിവരെ ഇത്തരം ദുരന്തങ്ങള് ഒഴിവാക്കുവാന് കഴിയുമായിരുന്നു. വിലപ്പെട്ട മനുഷ്യ ജീവനുകള് റയില് പാളത്തില് നഷ്ടപ്പെട്ടിട്ടും റയില്വേ അധികൃതര് നോക്കുകുത്തിയതോടെയാണ് നാട്ടുകാര് പ്രക്ഷോഭത്തിന് ഒരുങ്ങു ന്നത്.
ഇതു സംബന്ധിച്ച് റയില്വേ അധികൃതര്ക്ക് നിവേദനം നല്കിയിരിക്കുകയാണ് ജനങ്ങള്.
