പാലക്കാട്: ഗതാഗതക്കുരുക്കില് കുടുങ്ങി ഉദ്യോഗാര്ഥികള്ക്ക് പിഎസ്സി പരീക്ഷ എഴുതാനായില്ല.
ഇന്നലെ പാലക്കാട് ജില്ലക്ക് വേണ്ടി നടത്തിയ എല് ഡി ക്ലാര്ക്ക് പരീക്ഷക്കായി പാലക്കാടിന് പുറമെ തൃശൂര്, ഏറണാകുളം, മലപ്പുറം ജില്ലകളിലും പരീക്ഷാ കേന്ദ്രങ്ങളുണ്ടായിരുന്നു. തൃശൂരിലേക്ക് പരീക്ഷ എഴുതാനായി പോയ പല ഉദ്യോഗാര്ഥികളും കുതിരാനിലും തൃശൂര് നഗരത്തിലും മണിക്കൂറുകളോളം ഗതാഗതക്കുരുക്കില്പ്പെടുകയായിരുന്നു.
പാലക്കാട് നിന്ന് തൃശൂര് അഞ്ചേരി പരീക്ഷാകേന്ദ്രത്തില് ഗതാഗതക്കുരുക്കില്പ്പെട്ട് പത്ത് മിനുട്ടുകളോളം വൈകിയതിനെ തുടര്ന്ന് പതിനഞ്ചോളം പേര്ക്ക് പരീക്ഷ എഴുതാനായില്ല.രണ്ട് മണിക്ക് തുടങ്ങുന്ന പരീക്ഷക്ക് അരമണിക്കൂര് മുമ്പ് ഹാജരാവണമെന്നാണ് ചട്ടമെങ്കിലും പലര്ക്കും രണ്ട് മണിക്ക് ശേഷമാണ് ഗതാഗതക്കുരുക്കില്പ്പെട്ട് എത്താനായത്രെ. ഗതാഗതക്കുരുക്ക് പ്രശ്നം സെന്ററിലെ ഉദ്യോഗസ്ഥരോടെ പറഞ്ഞുവെങ്കിലും അവര് നിസ്സഹായത പ്രകടിപ്പിക്കുകമാത്രമാണ് ചെയ്തത്.
ഗതാഗതപരിഷ്ക്കാരത്തെ തുടര്ന്ന് ഒറ്റപ്പാലത്തുണ്ടായ ഗതാഗതക്കുരുക്കും പിഎസ്സി പരീക്ഷ ഉദ്യോഗാര്ഥികളെ മണിക്കൂറുകളോളം കുടുക്കി. വാഹന ബാഹുല്യത്തിന് പുറമെ കനത്തമഴയും വിവിധ കേന്ദ്രങ്ങളിലുണ്ടായ ഗതാഗതക്കുരുക്കിനിടയാക്കുകയും നിരവധി പേര്ക്ക് പരീക്ഷ എഴുതാനായില്ല.
