പെരിന്തല്‍മണ്ണ: മാരാകായുധങ്ങള്‍ കാട്ടി ഭീഷണിപ്പെടുത്തി 85 ലക്ഷം രൂപ കവര്‍ന്ന കേസിലെ ഏഴ്, എട്ട് പ്രതികള്‍ പിടിയില്‍. പാലക്കാട് പുളപ്പരിയാരം നെച്ചിപ്പുള്ളി സ്വദേശി ആനപ്പാറ വീട്ടില്‍ ബിവിന്‍(29), പാലക്കാട് ആനപ്പാറ കേട്ടേക്കാട് മൊളിയില്‍ വീട്ടില്‍ മുകേഷ്(32) എന്നിവരാണ് പിടിയിലായത്. 2015 ആഗസ്റ്റിലാണ് കേസിനാസ്പദമായ സംഭവം. ചെന്നൈയില്‍ നിന്ന് ട്രെയിന്‍ മാര്‍ഗ്ഗം പണവുമായി വന്ന മൂന്നംഗ സംഘം അങ്ങാടിപ്പുറം റെയില്‍വേ സ്റ്റേഷനില്‍ നിന്ന് ബസ് സ്റ്റോപ്പിലേക്ക് നടന്നു പോകുമ്പോള്‍ എഫ്‌സിഐ ഗോഡൗണിന് സമീപത്ത് വെച്ച് ആക്രമിക്കപ്പെടുകയായിരുന്നു. ബൊലേറോ ജീപ്പിലും ഇന്നോവ കാറിലുമായെത്തിയ 12 അംഗസംഘം ഇവരെ വാഹനത്തിലേക്ക് പിടിച്ചുകയറ്റി കൊണ്ടുപോയി 85 ലക്ഷം രൂപം കവര്‍ന്നെടുക്കുകയായിരുന്നു.
കേസിലെ മുഖ്യപ്രതികളെ പ്രത്യേക അന്വേഷണസംഘം നേരത്തെ അറസ്റ്റ് ചെയ്തിരുന്നു. കസ്റ്റഡിയിലെടുത്ത പ്രതികളെ കൂടുതല്‍ ചോദ്യം ചെയ്തതില്‍ നിന്ന് സംഘം മുമ്പ് നടത്തിയ കവര്‍ച്ചകളെ കുറിച്ചും മറ്റുപ്രതികളെ കുറിച്ചും പോലീസിന് വിവരം ലഭിച്ചിട്ടുണ്ട്. ഡിവൈഎസ്പിയുടെ നേതൃത്വത്തില്‍ സിഐ ടി.എസ്.ബിനുവും സംഘവുമാണ് തുടര്‍ അന്വേഷണം നടത്തുന്നത്.
പ്രതികരിക്കാൻ ഇവിടെ എഴുതുക: