മണ്ണാര്ക്കാട്: കാറിലൊളിപ്പിച്ച 75 ലക്ഷം രൂപയുടെ കുഴല്പ്പണവുമായി മൂന്നുപേര് മണ്ണാര്ക്കാട് പിടിയില്. കല്ലടി കോളേജിനു പരിസരത്ത് പരിശോധന നടത്തുന്നതിനിടെയാണ് സിഫ്റ്റ് കാറിന്റെ രഹസ്യ അറയില് സൂക്ഷിച്ച 75 ലക്ഷം രൂപ പിടികൂടിയത്. രണ്ടായിരത്തിന്റെയും അഞ്ഞൂറിന്റെയും പുതിയ നോട്ടുകളായാണ് ഇവ സൂക്ഷിച്ചിരുന്നത്.
കരിങ്കല്ലത്താണി താഴേക്കോട് നാലകത്ത് വീട്ടില് നൗഷാദ് ബാബു(38),തൊടുകാപ്പ് കൊണ്ടോട്ടി പറമ്പില് വീട്ടില് കുഞ്ഞാണി എന്ന കോയ(50),കോരംച്ചാടി വീട്ടില് മുഹമ്മദ് ഫയാസ്(23) എന്നിവരെയാണ് അറസ്റ്റ് ചെയ്തത്.
അമിതവേഗതയിലെത്തിയ കാര് പോലീസ് തടയുകയായിരുന്നു. തുടര്ന്ന് ചോദ്യം ചെയ്തതിലാണ് കാറിന്റെ മൂസിക് സിസ്റ്റത്തിന്റെ രഹസ്യ അറയില് സൂക്ഷിച്ചിരുന്ന കുഴല്പ്പണം കണ്ടെത്തിയത്.
കാറിന്റെ എസിയുടെ ഭാഗം ഇളക്കിമാറ്റിയാണ് രഹസ്യഅറ നിര്മ്മിച്ചിരിക്കുന്നത്.
2000 രൂപയുടെ 37 കെട്ടുകളും, 500 രൂപയുടെ രണ്ടുകെട്ടുകളുമാണ് ഉണ്ടായിരുന്നത്.പ്രതികളെ ചോദ്യം ചെയ്താല് മാത്രമെ മുഖ്യകണ്ണികളെക്കുറിച്ചുള്ള സൂചനലഭിക്കൂവെന്ന സിഐ ഹിദായത്തുള്ള മാമ്പ പറഞ്ഞു.
എസ് ഐ ഷിജു എബ്രഹാം,എഎസ്ഐ നൗഷാദ്, ഹൈവേ പോലീസ് എസ്ഐ ശ്രീകുമാര്, സിപിഒമാരായ ദേവസ്യ, പൊടിമോന്, അരവിന്ദന്, സുനീഷ് എന്നിവരടങ്ങിയ സംഘമാണ് പ്രതികളെ പിടികൂടിയത്.
