പീരുമേട്: ഏലപ്പാറയില് സ്വകാര്യ വ്യക്തിയുടെ പട്ടയഭൂമി തട്ടിയെടുക്കാന് ശ്രമം. ഏലപ്പാറ സ്വദേശി സെല്വരാജിന്റെ 81 സെന്റ് ഭൂമിയാണ് കോണ്ഗ്രസ് നേതാവ് രാജു പി ജോര്ജ് കൈയടക്കി വച്ചിരിക്കുന്നത്. 15 വര്ഷമായി അനധികൃതമായി കൈയടക്കി വച്ചിരിക്കുന്ന ഭൂമിയാണ് ഇയാള് വ്യാജപട്ടയം ഉണ്ടാക്കി തട്ടിയെടുക്കാന് ശ്രമിക്കുന്നത്.
നേതാവിന്റെ ഭീഷണിമൂലം ഈ വസ്തുവിനോട് ചേര്ന്നുള്ള സ്വന്തം പുരയിടത്തില് നിന്നു മാറി വാടകയ്ക്കാണ് കുടുംബം രണ്ട് വര്ഷമായി കഴിയുന്നത്. ടൗണിലെ പച്ചക്കറിക്കടയുടെ മുകളിലുള്ള ഇടുങ്ങിയ മുറിയിലാണ് സെല്വരാജും ഭാര്യയും മൂന്ന് പെണ്മക്കളും അടങ്ങിയ കുടുംബം ജീവിതം തള്ളി നീക്കുന്നത്. വിവാഹം കഴിച്ച് അയച്ച മൂത്ത മകളും പ്രസവത്തെ തുടര്ന്ന് മാസങ്ങളായി കുഞ്ഞുമൊത്ത് ഇവിടെ തന്നെയാണ് കഴിയുന്നത്.
184/1 എന്ന സര്വ്വേ നമ്പരില് ഉള്പ്പെട്ട ഒരു ഏക്കര് 79 സെന്റ് ഭൂമിയാണ് സെല്വരാജിന് സ്വന്തമായി പട്ടയം ഉള്ളത്. തന്റെ പട്ടയ വസ്തു അനധികൃതമായി കൈയേറിയതായി കാണിച്ച് സെല്വരാജ് കോടതിയില് പരാതി നല്കി. മൂന്ന് തവണ കോടതിയില് നിന്ന് സെല്വരാജിന് അനുകൂലമായി വിധി പുറപ്പെടുവിച്ചിരുന്നു.
എന്നാല് കൈയേറ്റക്കാരന് ഈ ഭൂമി മറ്റൊരാള്ക്ക് പാട്ടത്തിന് നല്കിയിരിക്കുകയാണ്. ഈ വസ്തുവിന്റെ പട്ടയം ബാങ്കില് പണയപ്പെടുത്തി സെല്വരാജ് വായ്പ എടുത്തിട്ടുണ്ട്. ഈ ബാങ്കില്ത്തന്നെയാണ് കോണ്ഗ്രസ് നേതാവിന്റെ ഭാര്യ ജിജി പ്യൂണായി ജോലി ചെയ്യുന്നത്. വസ്തുവിന് ഈ വര്ഷം സെല്വരാജ് കരം അടച്ചിരുന്നു.
കൈയേറ്റക്കാരന് ഇയാളുടെ ഭാര്യ ജിജിയുടെ പേരില് പട്ടയത്തിന് അപേക്ഷ നല്കിയതിനെ തുടര്ന്ന് റവന്യൂ ഉദ്യോഗസ്ഥര് സര്വ്വേയ്ക്ക് എത്തിയിരുന്നെങ്കിലും സ്ഥലമുടമയുടെ എതിര്പ്പിനെ തുടര്ന്ന് മടങ്ങുകയായിരുന്നു.
തന്റെ സ്ഥലം തിരിച്ച് കിട്ടിയില്ലെങ്കില് ആത്മഹത്യ മാത്രമാണ് പോംവഴിയെന്നും മക്കളുടെ വിവാഹം ഉള്പ്പെടെ മുടങ്ങിയതായും ദളിതനായ സെല്വരാജ് പറയുന്നു.
