കോഴിക്കോട്: സംസ്ഥാനത്ത് ജനാധിപത്യത്തിന്റെ പേരില് മതാധിപത്യം മേല്ക്കൈ നേടിയിരിക്കുകയാണെന്ന് എം.എന്. കാരശ്ശേരി. ദിലീപിന്റെ സ്ഥാനത്ത് ഏതെങ്കിലും പുരോഹിതനോ വൈദികനോ മതപണ്ഡിതനോ ആയിരുന്നെങ്കില് അറസ്റ്റ് നടക്കില്ലായിരുന്നുവെന്നും ഡോ. എം.എന്. കാരശ്ശേരി പറഞ്ഞു. ഖുര്ആന് സുന്നത്ത് സൊസൈറ്റി നടത്തിയ ചേകന്നൂര് മൗലവി അനുസ്മരണവും മതഭീകര വിരുദ്ധ ദിനാചരണവും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഇവിടെ നിയമത്തിനും ജനാധിപത്യത്തിനും മേലെയാണ് മതാധിപത്യവും ധനാധിപത്യവും വളരുന്നത്. മൂന്നാറില് കുരിശ് നീക്കിയപ്പോള് കമ്മ്യൂണിസ്റ്റുകാരനായ പിണറായി വിജയന് പോലും അതംഗീകരിച്ചില്ല. മതഭ്രാന്തിന് ഇവിടെ അധികാരമുണ്ടെന്നും അദ്ദേഹം പറഞ്ഞു. 19 കൊല്ലം ചേകന്നൂര് മൗലവിയുടെ കൊലപാതക കേസ് നടന്നു. ഒരിക്കല്പോലും നിയമസഭയില് ഒരാള് പോലും അദ്ദേഹത്തിനു വേണ്ടി ചോദ്യം ചോദിച്ചില്ല. ഖുര്ആന് സുന്നത്ത് സൊസൈറ്റിക്ക് വോട്ടുബാങ്കില്ലാത്തതാണ് കാരണം. ചേകന്നൂര് മൗലവിയുടെ കേസ് വീണ്ടും അന്വേഷിക്കാന് തയ്യാറാകണമെന്നും അതിന് പിന്നിലെ പ്രേരണ കണ്ടെത്തണമെന്നും കാരശ്ശേരി പറഞ്ഞു.
സൊസൈറ്റി സംസ്ഥാന വൈസ് പ്രസിഡന്റ് ഡോ.ജലീല് പുറ്റെക്കാട് അധ്യക്ഷനായി. ജാഫര് അത്തോളി, എ.പി.അഹമ്മദ്, അബ്ദുസലാം ബാഖവി, എം.എസ്.റഷീദ്, കരീം കോഴിക്കോട് തുടങ്ങിയവര് സംസാരിച്ചു. ഖുര്ആന് പഠനസംഗമം മുതൂര് അബൂബക്കര് മൗലവി ഉദ്ഘാടനം ചെയ്തു. ബഷീര് താനാളൂര്, സൈതലവി അന്സാരി മണ്ണാര്ക്കാട്, നവാസ് മൂവാറ്റുപുഴ, സലീം കോഴിക്കോട്, സിദ്ധീഖ് കോഴിക്കോട് തുടങ്ങിയവര് സംസാരിച്ചു.
