തൃശൂര്: ശക്തന്നഗറില് റോഡിലെ കുഴികളടച്ച് കോര്പ്പറേഷനെ നാണം കെടുത്തിയ പോലീസ് നടപടിക്കിടയാക്കിയത് എഞ്ചിനീയറിങ്ങ് വിഭാഗത്തിന്റെ കെടുകാര്യസ്ഥത. തകര്ന്ന റോഡുകള് അറ്റകുറ്റപണി നടത്തണമെന്ന് പോലീസ് പല തവണ ആവശ്യപ്പെട്ടിട്ടും നടപടി ഉണ്ടാകാത്തതിനെ തുടര്ന്ന് അസി കമ്മീഷ്ണര് പി.വാഹിദിന്റെ നേതൃത്വത്തില് പോലീസ് തന്നെ കോണ്ക്രീറ്റിങ്ങ് നടത്തി ശക്തന് നഗറിലെ കുഴികളടച്ചത് ജനശ്രദ്ധ പിടിച്ചുപറ്റിയിരുന്നു.
ഈ അവസ്ഥ കോര്പ്പറേഷന് നാണക്കേടുണ്ടാക്കിയെങ്കിലും പോലീസിന്റെ സേവനത്തെ മേയര് അജിത ജയരാജന് പത്രസമ്മേളനത്തില് അഭിനന്ദിച്ചു. കൗണ്സിലിന്റെയും മേയറുടെയും നിര്ദ്ദേശങ്ങള് പാലിക്കാത്ത എഞ്ചിനിയറിങ്ങ് വിഭാഗമാണ് കോര്പ്പറേഷന് നാണക്കേടുണ്ടാക്കിയത്. ശക്തനിലെ ഉള്പ്പെടെയുള്ള വന് കുഴികള് നികത്താന് അടിയന്തിര നടപടിക്കായി മരാമത്ത് കമ്മിറ്റി ചെയര്മാന് അഡ്വ.എം.പി.ശ്രീനിവാസന് ജൂലായ് മൂന്നിന് മേയര്ക്ക് കത്ത് നല്കി. ശക്തന്സ്റ്റാന്റ് ശങ്കരയ്യറോഡ് ജംഗ്ഷന്, പാലിയം റോഡ്, പാട്ടുരായ്ക്കല് ജംഗ്ഷന്, ചെട്ടിയങ്ങായി ജംഗ്ഷന്, വടക്കേച്ചിറ എന്നീ സ്ഥലങ്ങള്ക്ക് പുറമെ നഗരത്തിലെ മുഴുവന് റോഡുകളും അറ്റകുറ്റപ്പണി നടത്താന് ശ്രീനിവാസന് കത്തില് നിര്ദ്ദേശിച്ചിരുന്നു.
ബന്ധപ്പെട്ട എഞ്ചിനീയര്മാരുടെ യോഗം അടിയന്തിരമായി വിളിച്ചുകൂട്ടി നടപടി സ്വീകരിക്കാനും റിപ്പോര്ട്ട് ചെയ്യാനും മരാമത്ത് കമ്മിറ്റി ചെയര്മാനെ ചുമതലപ്പെടുത്തിക്കൊണ്ട് അന്നുതന്നെ മേയര് മറുപടി കത്ത് നല്കുകയും ചെയ്തു. ഇതനുസരിച്ച് എഞ്ചിനീയര്മാര് ഉള്പ്പടെയുള്ളവരുടെ അടിയന്തിര യോഗം ജൂലായ് നാലിന് ചേരുന്നതിന് മൂന്നിനുതന്നെ ചെയര്മാന് നോട്ടീസ് നല്കി. രണ്ട് ദിവസത്തിനകം, എസ്റ്റിമേറ്റുകള് തയ്യാറാക്കി സമര്പ്പിക്കാനും അടിയന്തിരമായി പണികള് നടത്താനും കോര്പ്പറേഷന് എഞ്ചിനീയറെ ചുമതലപ്പെടുത്തിയെങ്കിലും ഒന്നും നടന്നില്ല.
അല്ലെങ്കില് മൂന്ന് ദിവസത്തെ കാലാവധിയില് അടിയന്തിര ടെണ്ടര് നടത്തി കരാര് നല്കാം. പക്ഷേ മൂന്നാഴ്ച കഴിഞ്ഞിട്ടും കോര്പറേഷനിലെ എഞ്ചിനിയറിങ്ങ് വിഭാഗം അനങ്ങിയില്ല. റിലയന്സ് കേബിള് ഇടപാടില് മേയര് അടിയന്തിരമായി ആവശ്യപ്പെട്ട വിശദീകരണം മാസങ്ങള് പിന്നിട്ടിട്ടും എഞ്ചിനീയറിങ്ങ് വിഭാഗം നല്കാത്തത് കൗണ്സില് യോഗത്തില് വിമര്ശനത്തിനിടയാക്കിയിരുന്നു.
